24 Тохсунньу 24.01
  • -48°
  • $ 73,82
  • 83,32

Мэҥэ Хаҥалас Төхтүрүгэр ‒ саҥа дьиэ

15:25, 30 августа 2016

Атырдьах ыйын 26 күнүгэр Дьаҥхаады нэһилиэгэр федеральнай уонна өрөспүүбүлүкэтээҕи тус аадырыстаах бырагыраамалар чэрчилэринэн, хаарбах дьиэттэн толору хааччыллыылаах саҥа таас дьиэҕэ көһүү үөрүүлээх тэрээһинэ буолла.


Аллараа Төхтүрү киэргэтэр 8 кыбартыыралаах дьиэни биир дойдулаахпыт Николай Шишигин салайааччылаах «Авангард» оҥорон таһаарар тутуу хампаанньатын үлэһиттэрэ 14 ый иһигэр тутан бүтэрбиттэр. Дьиэҕэ киирии үөрүүлээх күнүгэр СӨ үтүөлээх оһуокайдьыта Михаил Жирков аал уоту оттон алгыстаата.

Төхтүр1

Улуус баһылыгын бастакы солбуйааччы Павел Сазонов хаарбах дьиэттэн олохтоохтору көһөрүү бырагыраама улууспутугар 2013 сыллаахтан үлэлээн, 145 кыбартыыра тутуллубутун, 637 киһи саҥа дьиэлэргэ көһөрүллүбүтүн иһитиннэрдэ. Бырагыраама Майаны, Аллараа Бэстээҕи сэргэ Паловскайга, Табаҕаҕа, Хаптаҕайга уонна Төхтүргэ үлэлээбит. 2016 сылга улууска 376 мөлүйүөн суумалаах көмө оҥоһуллубут. Аны 2017 сылга 112 кыбартыыра тутуллара күүтүллэр диэтэ.

Олохтоохторго эҕэрдэ тылын «Дьаҥхаады нэһилиэгэ» МТ баһылыга Иннокентий Яковлев тириэртэ. Оҥорон таһаарар тутуу хампаанньатын үлэһиттэрэ төһө да уустуктары көрүстэллэр анаммыт болдьохторугар үлэлэрин түмүктээн хаачыстыбалаах дьиэни бэлэхтээтилэр диэн эттэ, нэһилиэк сайдарын биир кэрэһитэ ‒ 75 миэстэлээх саҥа оҕо садын туттарыы үлэтэ саҕаланыаҕа диэн үөрүүлээх сонуну иһитиннэрдэ.

Махтал суруктарынан тутууга үлэлэспит биир дойдулаахтара Прокопий Романов, Василий Цой, Петр Цой, Ньургун Максимов бэлиэтэннилэр. Биирдии-иккилии хостордоох, киэҥ-куоҥ, сырдык, сылаас кыбартыылалар күлүүстэрин Наталья Кириллина, Александра Дмитриева, Варвара Максимова, Мария Третьякова, Светлана Шараборина, Елена Барабанова, Лидия Олесова, Николай Егоров туттулар.

0
0
24 января 24.01
  • -48°
  • $ 73,82
  • 83,32