Төхтүрдээҕи оҕо ускуустубатын оскуолатын көҕүлээһининэн муус устар 12 күнүгэр Аан бастакы Аһаҕас республиканскай «Ширма нөӊүө» («За ширмой») диэн фортепиано кылааһын үөрэнээччилэригэр куонкурус буолан ааста.
Бу куонкурус сүрүн сыала – дьүүллүүр сүбэ кыттааччыны көрбөккө, хантан сылдьарын, ким үөрэнээччитэ буоларын билбэккэ, толорооччуну чахчы талаанынан, инструмеӊӊа оонньуур маастарыстыбатынан сыаналааһын. Ону таһынан, оҕолор музыканан ыкса дьарыгыралларын өйөөһүн, интэриэстэрин тардыы, уһуйааччылар икки ардыларыгар сылаас сыһыаны олохтооһун. Дьүүллүүр сүбэ састаабыгар киирдилэр ыӊырыылаах ыалдьыттар Марк Жирков аатынан Дьокуускайдааҕы музыкальнай колледж уһуйааччылара Лира Кулаковская, Анисья Кривошапкина , Дьокуускайдаа5ы 2-с нүөмэрдээх оҕо ускуустубатын оскуолатын уһуйааччыта Екатерина Сергучева.
Күрэх кыттааччылара этюд уонна пьеса толорууга үс бөлөҕүнэн арахсан күрэхтэстилэр: кыралар (7 — 9 саастаахтар), орто (10 — 12 саастаахтар), улахаттар (13 — 15 саастаахтар).
Уопсайа күрэхтэһиигэ 35 оҕо Сахабыт сирин 7 улууһуттан кэлэн кыттыыны ыллылар. Ол курдук, ыалдьыттарбыт Хаандыгаттан, Намтан, Уус-Алдан Бороҕонуттан, Суоттуттан, Горнай Бэрдьигэстээҕиттэн, Чурапчыттан, Тааттаттан, Мэӊэ-Хаӊаластан Майа, Аллараа Бэстээх, Төӊүлү, Төхтүр бу күрэхтэһиигэ көрүстүлэр, санаа атастаһан, саӊа сүүрээни көрөн сэргээн, биһирээн бардылар. Төхтүр чиэһин көмүскээбит оҕолорбут ситиһиилээхтик кытыннылар.
Хас биирдии категорияҕа алта бириистээх миэстэ таҕыста үс истиэпэннээх Дипломаннар уонна үс истиэпэннээх Лауреаттар. Кыраларга 15 оҕоттон бастакы миэстэни ылары ситистэ Рыгалов Максим (Хаандыга), иккис миэстэ – Маркова Лия (Төхтүр), үһүс миэстэ – Портнягин Костя (Төӊүлү). Орто саастаахтарга 14 кыттааччыттан бастакы миэстэни ылла Егоров Вася (Нам), иккис – Жиркова Жанна (Майа), үһүс – Сивцева Катя (Нам). Улахаттарга бастаата Шамаева Аня (Чурапчы), иккис – Ширшова Лиза (Хаандыга), үһүс Сыромятникова Айта (Хаандыга).
Кыттааччылар бары тэрээһини үрдүк таһымнаахтык сыаналаан, ыалдьыттарга барыларыгар истиӊ эйэҕэс сыһыаны бэлиэтээн, астына-дуоһуйа алтыһан бардылар.
Маннык киэӊ хабааннаах күрэххэ үс араас категориянан кыайыылаахтарга бириис оӊорорго спонсордаатылар биһиги, Дьаӊхаады нэһилиэгин олохтоохторо, киэӊ туттар биир дойдулаахтарбыт Саха сирин норуотун хаһаайыстыбатын үтүөлээх үлэһитэ Шарин Александр Николаевич, Саха сирин үтүөлээх бырааһа Бугаев Григорий Дмитриевич, Мэӊэ-Хаӊалас улууһун депутата Новиков Ян Аркадьевич. Тэрээһин кэмигэр күүс-көмө буоллулар олохтоох дьаһалта (баһылык солбуйааччыта Пермякова Людмила Николаевна), техническай центр коллектива (директор Попов Николай Федосеевич), оскуола коллектива (директор Стручков Василий Николаевич), «Мичил» о5о садын коллектива (сэбиэдиссэй Романова Надежда Дмитриевна). «Ширма нөӊүө» конкурс ыытылларыгар көмөлөспүт бар дьоммутугар барҕа махталбытын тиэрдэбит!
Ыспыраапка:
Фортепиано отделениета Төхтүргэ Майатааҕы оҕо ускуустубатын оскуолатын филиала 1979 сыллаахха арыллыаҕыттан ыла баар. Аан маӊнайгы фортепианоҕа уһуйааччынан Столбцова Татьяна Андреевна (1979 — 1990) үлэлээбитэ. Араас сылларга Шаповалова Елена Владимировна (1981-1982), Гаппурова Наталья Михайловна (1982-1983), Липецкая Татьяна Вячеславовна (1983–1985), Мальцева Марина Владимировна (1983–1985), Матханова Галина Михайловна (1986–1987), Попова Галина Юрьевна (1988–1989), Герасимова Екатерина Кимовна (1991–1994), Егорова Мария Валентиновна (2005–2006) оҕолору үөрэппиттэрэ.
2005 сылтан бүгүӊӊү күӊӊэ диэри фортепианоҕа уһуйааччынан үлэлиир үрдүк категориялаах преподаватель, СР культуратын туйгуна Ульяна Егоровна Собакина. Кини үөрэнээччилэрэ үрдүк таһымнаах күрэхтэргэ өрүү инники күөӊӊэ сылдьаллар, бириистээх миэстэҕэ тиксэллэр.
Ольга Максимова, «Төхтүрдээҕи оҕо ускуустубатын оскуолатыгар» оҕолору иитэр-үөрэтэр үлэҕэ дириэктэри солбуйааччы.
