«Байыаннай дьайыы хонуутугар көмөнү ыытыы онус траншеянан салҕанан барар. Биһиги байыастарбытыгар табаарынай-матырыйаалынай сыаннастары ыытыы от ыйын үһүс дэкээдэтигэр, оттон тиэхиньикэни -атырдьах ыйын ортотугар диэри былааннанар», – диэн бүгүн, от ыйын 3 күнүгэр, Саха сирин Гражданскай оборуонаҕа уонна нэһилиэнньэ олоҕор куттал суох буолуутун хааччыйар министирэ Дмитрий Лепчиков иһитиннэрдэ.
Кини ааспыт нэдиэлэҕэ Дьокуускайга Өрөспүүбүлүкэтээҕи биир кэлим координационнай киин салайааччыта Андрей Федотов кыттыылаах тиэхиньикэ саҥа моделларын билиһиннэриилээх көһө сылдьар сүбэ мунньах буолан ааспытын бэлиэтээтэ.
«Тэрээһин түмүгүнэн биһиги байыастарбытыгар олохтоох оҥорон таһаарааччылартан саҥа тиэхиньикэни атыылаһыыга быһаарыы ылыллыаҕа», — диэн миниистир чопчулаата.
Дмитрий Лепчиков бу от ыйын 1 күнүгэр Беркакит ыстаансыйатыгар Норуот фронун эрэгийиэннээҕи салаатын лииньийэтинэн тэрилтэлэртэн уонна спонсордартан хомуллубут 8 тырааныспар кэлбитин эттэ.
«Салгыы тимир суолунан бу массыыналары Ростов куоракка тиэрдэн, салгыы биир дойдулаахтарбытыгар байыаннай дьайыы хонуутугар илдьиэхтэрэ», — диэн Дмитрий Лепчиков кэпсээтэ. Саха сирин суһал ыстааба анал байыаннай дьайыыга кыттар сулууспалааччылары эбии экипировканан уонна оборудованиенан хааччыйыыга үлэтин салгыыр, суруйда Саха сирэ саайт.
