Саха сиригэр дьахталлар хамсааһыннарын бэрэстэбиитэллэрэ, көхтөөх ийэлэр Саха АССР 100 сылын уонна Ийэ сылын хайдах-туох соруктаах ыытарга идеяларын XV Съезтэрин кэмигэр эттилэр. Ийэ буолуу уонна оҕо саас тиэмэлэринэн этиилэрэ регион баһылыгын сорудаҕын биэрэчинигэр киллэрилиннэ. Бэс ыйыгар буолуохтаах «Демографическое развитие Дальнего Востока и Арктики» Россиятааҕы конференция иитинэн улахан социальнай форум бэлэмнэнэрин иһитиннэрдилэр, суруйар СИА.
Саха сирин дьахталларын XV Съезтэрин «Национальный проект «Демография»: общественный вклад в будущее страны» сессиятыгар ийэ буолууга уонна оҕо саас тиэмэлэригэр көдьүүстээх боппуруостарга дьүүллэһиилэр буоллулар.
Ил Дархан Айсен Николаев 2022 сылы Ийэ сылынан биллэрбитэ. Кини ол дьаһалга ийэ, дьахтар олоҕун усулуобуйатын тупсарыыга, үлэтигэр ситиһиитигэр болҕомто ууруллуохтааҕын эппитэ. Онон ийэ буолуу уонна оҕо саас саамай тыын, кыһалҕалаах боппуруостарын түргэн кэм быһаарарга сорудахтаабыта.
Дьахталлар хамсааһыннара, ордук эдэр ийэлэр, сүргэлэрэ көтөҕүллүбүтэ уонна бастакы күнтэн дьаһал туолуутугар көхтөөхтүк ылсан барбыттара.
Регион социальнай сайдыыга миниистирэ Елена Волкова иһитиннэрбитинэн, сыл устата судаарыстыбаннай былаас уоргаттара көхтөөх ийэлэри кытта саҥа көҕүлээһиннэри дьүүллэһиэхтэрэ уонна ол олоххо киириитигэр үлэлиэхтэрэ. Дьахтар, ийэ доруобуйата чөл буолуутугар, кыргыттары ийэ буоларга иитиигэ, ийэ буолууну уонна оҕо сааһы өйүүргэ, уопсастыбаннай көҕүлээһиннэри, дьахтар дьарыктаах буолуутугар, элбэх оҕолоох ийэлэргэ биэнсийэ уонна да атын элбэх боппуруоска тэрээһиннэр ыытыллыахтара.
«Бэс ыйыгар «Демографическое развитие Дальнего Востока и Арктики» улахан форум буолара былааннанар. Манна Уһук Илини сайыннарыыга министиэристибэ кыттыаҕа. Сүрүн тиэмэнэн демография буолуоҕа. Федеральнай таһымнаах экпертэр үлэлиэхтэрэ. Манна оҕолоох ыаллары уонна саастаах көлүөнэни кытыннарар соруктаахпыт», — диэтэ салайааччы.
Сиһилии https://ysia.ru/materi-yakutii-predlagayut-obedinitsya-v-god-100-letiya-yaassr/
Хаартыска: Анастасия Филиппова, СИА
