«Чэбдик нэһилиэк» бырайыакка Саха сирин араас улуустарыттан 100 муниципальнай тэриллии кыттар.
Ааспыт сыл түмүгүнэн бырайыак «Лучшие практики популяризации здорового образа жизни на территории Российской Федерации» Бүтүн Арассыыйатааҕы куонкурус дипломана буолбута. Урут Ил Дархан Айсен Николаев бэлиэтээбитинэн, «Чэбдик нэһилиэк» курдук бырайыактары Саха сирин үрдүнэн өйүөххэ уонна сайыннарыахха наада.
«Бырайыак нэһилиэнньэ доруобуйата туруктаах буолуутугар, физическэй култууранан уонна успуордунан утумнаахтык дьарыктанары тэрийиигэ, Саха сиригэр физическэй култууранан уонна успуордунан дьарыктанар дьон ахсаанын элбэтиигэ туһуланар. Билигин бырайыакка өссө эбии 50 нэһилиэги киллэрэрбит былааннанар», — диэн бэлиэтээтэ бырайыак салайааччыта Зинаида Афанасьева. Бырайыак кыттааччыларыгар успуорт инвентардара, экипировкалара уонна наҕараадаҕа атрибуттар бэриллэллэр.
«Биһиги үчүгэй хаачыстыбалаах успуорт инвентарын ылбыппыт. Он кытта мэтээллэринэн уонна грамоталарынан хааччыллыбыппыт. Биһиги урут даҕаны маннык успуорт тэрээһиннэрин ыыппыппыт. Бырайыакка 2023 сылтан кыттабыт. Нэһилиэнньэ успуорка көҕө үрдээтэ. Олохтоохтор ааттарыттан көмөҕүт иһин махтанабыт», — диэн Төҥүлү нэһилиэгин баһылыга Петр Эверстов үллэһиннэ.
Хас биирдии нэһилиэккэ уопсастыбаннай инструктордар физкултуурунай-чэбдигирдэр уонна успуорт тэрээһиннэрин ыыталлар, ону тэҥэ ГТО нуормаларын тутталлар. Инструктордар бары «Чэбдик нэһилиэк» бырайыагынан идэни үрдэтэр куурустар үөрэҕин ааспыттара. Нэһилиэктэринэн барыта былырыын 2436 физкултуурунай- чэбдигирдэр уонна успуорт маассабай тэрээһиннэрэ ыытыллыбыттара. Кинилэри араас саастарыттан 65,4 тыһ. тахса киһи хабылынна.
Үлэлэр «Спорт – норма жизни» федеральнай бырайыак чэрчитинэн дойду Президенэ Владимир Путин көҕүлээбит «Демография» национальнай бырайыак чэрчитинэн ыытыллаллар.
«Чэбдик нэһилиэк» бырайыак 2021 сылтан СӨ Физическэй култуураҕа уонна успуорка министиэристибэтэ олоххо киллэрэр, суруйда СӨ Ил Дарханын уонна Баһылыгын пресс-сулууспата.
Источник: Саха сирэ саайт.
