Саха сиригэр «Союз-2» таһаарааччы ракета көтүүтүгэр трассаны бэлэмнээһин саҕаланна. Ракета сорҕото Алдан, Кэбээйи улуустарыгар түһүө. Бу туһунан айылҕа харыстабылын министиэристибэтэ иһитиннэрэр.
«Союз» ракета көмөтүнэн орбитаҕа OneWeb сибээс спутниктарын бөлөҕүн уочараттаах тиэрдии ахсынньы 17 күнүгэр былааннанар. Ракета «Восточнай» космодромтан көтүө.
Айылҕа харыстабылын миниистирэ Сахамин Афанасьев бүгүн стартовай комплекстары чинчийэр инстутит (ФГУП «ЦЭНКИ» — «Научно-исследовательский институт стартовых комплексов») исписэлиистэрэ кыттыылаах тэрээһин мунньаҕын ыытта. Хамыыһыйа чилиэттэрэ үлэ былаанын кытары билистилэр. Мунньах кэмигэр Сахамин Афанасьев үлэ хаамыытын бэйэтэ хонтуруоллуурун эттэ.
Саха сириттэн оробуочай бөлөххө министиэристибэ үлэһиттэрэ, быыһыыр сулууспа, куттала суох буолуу судаарыстыбаннай кэмитиэт, Кэбээйи, Алдан улуустарын дьаһалталарын үлэһиттэрэ киирдилэр.
Трассаны бэлэмнээһин, ракета көппүтүн кэннэ чинчийии үлэлэрэ ахсынньы бүтүөр диэри барыахтара.
This post was published on 01.12.2020 17:01 17:01