24 Тохсунньу 24.01
  • -48°
  • $ 73,82
  • 83,32

Оҕо үтүөрэригэр эрэл баар

11:17, 22 апреля 2016
Текст:
Муус устар 20 күнүгэр Саха сирин бырабыыталыстыбатын бэрэссэдээтэлэ Галина Данчикова   тус бэйэтин хонтуруолунан туттарбыт объектарыттан биирдэстэригэр – оҕо сэллигин өрөспүүбүлүкэтээҕи санаторийыгар сырытта. Галина Иннокентьевна санаторий тутулла турар кэмигэр хаста да кэлэ сылдьан, үлэ хаамыытын билсибитэ, туһааннаах ыйыылары-кэрдиилэри биэрбитэ.

Манна сыһыаран эттэххэ,   кини көҕүлээһининэн Дьокуускайга Дьиэ кэргэн уонна оҕо доруобуйатын харыстабылын киинэ, оҕо сэллигин өрөспүүбүлүкэтээҕи санаторийа, Оҕо дьиэтэ, куорат 3 №-дээх поликлиниката тутулуннулар. Билигин кардиология киинин бырайыактааһын үлэтэ бара турар.

да0

Покровскайдыыр суол хаҥас өттүгэр хойуутук үүммүт бэстэр быыстарыгар 3 мэндиэмэннээх таас дьиэлэр ыраахтан килэйэн-халайан көстөллөр. Киэҥ сиринэн тайаан сытар санаторий тиэргэнигэр оҕолор оонньуулларыгар аналлаах мас тутуулар, спортивнай, сынньанар былаһааккалар баар буолбуттар.

да3

Татьяна Дмитриева аатынан оҕо санаторийын кылаабынай бырааһа (санаторий историятыгар үһүс салайааччы) Василий Старостин Галина Данчиковаҕа, СӨ доруобуйа харыстабылын миниистирин солбуйааччы Людмила Вербицкаяҕа санаторий иһин кэрийэ сылдьан көрдөрдө.

да7

Санаторий саҥа дьиэтин тутуу 2013 с. саҕаланан баран, 2015 с. алтынньыга үлэҕэ киирбитэ. Саҥа дьиэ 200 куойкалааҕыттан 110 куойката – оскуола иннинээҕи саастаах оҕолорго, 90 куойката үөрэнэр оҕолорго ананар. Уопсайа 6 400 кв. миэтэрэ иэннээх дьиэ үс этээстээх икки дьиэттэн турар. Икки дьиэни сылаас галерея ситимниир. Бу дьиэлэргэ эмтиир балааталар, үөрэнэр кылаастар, ЛФК, оҕо доруобуйатын чөлүгэр түһэрэр кабинеттар, сынньанар саалалар, спорт, үҥкүү, ырыа саалалара олохсуйбуттар.

да1

Манна сылга 13 сааһыгар диэри саастаах 700-чэ оҕо сытан эмтэнэр. Үрдүк категориялаах, РФ уонна СӨ туйгун быраастара үлэлииллэр.
Биир кэрэхсэбиллээҕэ, анал медицинскэй тэриллэрдээх лабораторияҕа 49 араас аналиһы ылыахха сөп. Урукку курдук, куорат араас балыыһаларыгар тарҕата сатаабакка.
Сырдык, ыраас остолобуойга оҕолор күҥҥэ алтата аһыыллар.

да5

– СӨ бырабыыталыстыбата, Галина Данчикова олус элбэх үлэни ыыттылар. Кинилэр көдьүүстээх үлэлэрин түмүгэр өр сылларга ыра санаа оҥостубут саҥа дьиэбитигэр киирэн үлэлии-хамсыы сылдьабыт. Дьиэ олус хаачыстыбалаахтык тутулунна, үлэлииргэ, оҕолор эмтэнэллэригэр усулуобуйа барыта баар. Биһиги махталбыт муҥура суох уонна куорат саҥа тутуллуохтаах объектара биһиэнин курдук, үчүгэй усулуобуйалаах, хаачыстыбалаах буолуохтарын баҕарабыт. Санаторийбыт өрөспүүбүлүкэ эмтиир тэрилтэлэриттэн биир кылаабынайдарынан уонна сэллигинэн ыалдьар кутталлаах бөлөххө киирэр оҕолорго көмөнү оҥорор анал тэрилтэнэн буолар, – диэн Василий Старостин үлэһиттэрин ааттарыттан махтанна.

да6

Галина Данчикова объектары көрөн баран, киэҥ-куоҥ саалаҕа киирэн үлэһиттэри кытары ирэ-хоро кэпсэттэ. Киниэхэ санаторий туһунан тахсыбыт саҥа кинигэлэри билиһиннэрдилэр, санаторий историятын кэпсээтилэр.
«Манна оҕо доруобуйатын чөлүгэр түһэрэригэр барыта баар. Оҕолор уонна кинилэр төрөппүттэрин итэҕэллэрин ылбыт иллээх-эйэлээх, үлэһит кэлэктиип буоларгытын өссө төгүл итэҕэйдим», – диэн Галина Данчикова түбүктээх үлэлэрэ үчүгэй түмүктээх буолбутуттан астынарын туһунан эттэ.

да8

Кырдьыга да, ааспыт үйэҕэ тутуллубут эргэ мас дьиэҕэ үлэлээн кэлбит үрүҥ халааттаах аанньаллар үөрбүт, астыммыт харахтарын көрөр, махтанар тылларын истэр олус долгутуулаах буолла.
0
0
24 января 24.01
  • -48°
  • $ 73,82
  • 83,32