Улуус дьаһалтатын баһылыга Александр Атласов, отделлар салайааччылара, специалистар, тэрилтэлэр бары күргүөмүнэн тахсан мас олордуутугар көхтөөх кыттыыны ыллылар.
Ааспыт нэдиэлэ бүтэһик күнүгэр Нам улууһугар маһы олордуу Бүтүн Россиятааҕы акция чэрчитинэн, Ленскэй нэһилиэк дьаһалтатын көҕүлээһининэн Доҕордоһуу, Максим Кирович Аммосов болуоссаттарыгар, Кыайыы уонна оҥоһулла турар Илья Егорович Винокуров сквердэригэр харыйалары, чэчирдэри, декоративнай мастары олордуталаатылар.
Андрей Бочкарев, «Ленскэй нэһилиэк» МТ баһылыгын социальнай боппуруоска солбуйааччы иһитиннэрбитинэн, былаан быһыытынан 750 маһы олоруохтаах. «Бу мас олордуутугар бастакы түһүмэхпит буолар. Болуоссаттарга, сквердэргэ тыллыбатах мастары уларытан биэрэбит. Онтон күһүн эмиэ бары күргүөмүнэн тахсан эбэн биэриэхпит. Быйыл Илья Егорович Винокуров 120 үбүлүөйдээх сылынан анаан кини аатынан уулуссаҕа тополь маһы олордон боруобалыахпыт. Үчүгэйдик үүннэҕинэ эһиил өссө ыламмыт олордуохпут», — диэн СИА-ҕа кэпсээтэ.
This post was published on 30.05.2016 16:11 16:11