«Муммуттар» сахалыы киинэни ыам ыйын 19 күнүттэн Казахстаҥҥа көрдөрүөхтэрэ. Киинэ бу дойду 10 куоратын олохтоохторун дьүүлүгэр тахсыаҕа.
Киинэ продюсерэ Яна Байгожаева кэпсэтиһии ыыппытын түмүгэр быйыл олунньу ыйга Москва куоракка дистрибьютор-комапнияны кытта дуогабар түһэрсиллибит, киинэ прокакка тахсар күнэ-дьыла анаммыт. «Мин Казахстан суруналыыстарыгар пресс-көрдөрүү оҥоруохпун баҕарабын. Сахалыы киинэ өрөспүүбүлүкэни, Россияны уҥуордаан, аан дойду таһымыгар тахсыан баҕарабын», — диир кини.
«Муммуттар» киинэ быйыл икки фестивальга кыттыбыта. «Дух огня» норуоттар икки ардыларынааҕы киинэ фестивалын дьүүллүүр сүбэтэ баһаарбытынан, бастыҥ музыкальнай киэргэтии иһин бэлиэтэммитэ. Ону таһынан ыам ыйын 21 күнүгэр ыытыллар Чебоксарытааҕы киинэ фестивалын куонкуруһун бырагырааматыгар киирбит.
«Муммуттар» киинэ режиссера — Алексей Амбросьев уонна Яна Байгожаева салайааччылаах «Тэтим» айар холбоһук. Киинэ сценарийын режиссер бэйэтэ суруйбут, онно 2002 сыл сайыныгар Үөһээ Дьааҥы улууһугар дьиҥнээх олоххо буолбут түбэлтэ ойууланар. Икки уол балыктыы баран мунан хааланнар дьиэлэригэр тиийбэтэхтэр. Кинилэри икки ый устата кыайан булбакка сылдьыбыттар.
