Хаарчахтаах прокакка 5 мөл.солк. хомуйбут «Сайсары күөлгэ» киинэни Москваҕа буолар норуоттар икки ардыларынааҕы «Новое российское кино» 38-с киинэ фестивалыгар көрдөрүөхтэрэ. Балаҕан ыйын 8 күнүттэн саха киинэтэ Россия прокатыгар тахсар.
«Кинотавр-2016» уонна Москваҕа буолар 38-с киинэ фестивалын тэрийээччилэрэ бастаан утаа прокакка сылдьыбыт киинэни ылартан аккаастаммыттара. Ол эрээри, кэлин ити быһаарыылара уларыйан, киинэ Россия бырагырааматыгар киирбитэ. Биһиги онтон олус үөрдүбүт», — диэн СИА-ҕа киинэ продюсера Марианна Скрыбыкина эттэ.
Итини таһынан «Сайсары күөлгэ» киинэ Россиятааҕы норуоттар икки ардыларынааҕы киинэ ырыынагын официальнай каталогар киирбит, ону таһынан «Кинобизнес сегодня» таһаарыыга бэчээттэммит. Ону таһынан «Бюллетень кинопрокатчика» хаарчахтаах прокат саамай быстыҥ киинэлэрин испииһэгин таһаарбыта. Онно саха киинэтэ испииһэк инники кирбиитигэр тахсыбыта.
Россия култуураҕа министиэристибэтэ киинэни үрдүктүк сыаналаабыта. Киинэ национальнай диэн анал туруктаммыта. Ол түмүгэр продюсер уонна ааптар судаарыстыба өйөбүлүн ылаллар.
Балаҕан ыйын 8 күнүттэн киинэ Россия прокатыгар тахсар. «Сайсары куөлгэ» аатын «Мой убийца» диэн тылбаастаабыттар. Билигин киинэҕэ дьон саҥатын, хартыына дьүһүнүн тупсарыы үлэтэ бара турар.
