Сотору кэминэн Мүрү нэһилиэгин иһигэр маршрутнай оптуобус сүүрэрэ күүтүллэр диэн, Мүрү Саһарҕата телеграм-ханаал суруйар.
2023 сылга сабыс-саҥа оҥоһуллан тахсыбыт ГАЗель NEXT оптуобус уопсайа 21 олорор миэстэлээх. Олорор сир ахсын төлөпүөнү сэрээттиэххэ сөп. Саахал эбэтэр ыксаллаах быһыы-майгы тахсыытын суһал көмө сулууспаларыгар тута биллэрэр “Эра-глонасска” холбоммут систиэмэлээх. Оҕо уонна аҕам саастаах дьон автобуска киирэллэригэр табыгастаах буоллун диэн анал пандустаах. Массыына салонугар 180 см уһуннаах киһи төҥкөйбөккө турар кыахтаах.
Билигин оптуобуһу Новосибирскай куораттан аҕалар үлэ тэриллэр. Айан тарыыба, маршрута, графига оҥоһулла сылдьар. Оптуобус Бороҕоҥҥэ кэллэ да, аны ГАИ чэрчитинэн үлэ ыытыллыаҕа. Онон оптуобус сэтинньи бүтэһигиттэн сүүрэрэ сабаҕаланар.
Ольга Шепелева
