«Кэскил түһүлгэтэ» форум дьиэ кэргэҥҥэ анаммыт түһүлгэтин Россия ийэлэрин хамсааһынын Уус Алданнааҕы салаатын салайааччыта Сусанна Аммосова, улуустааҕы психологическай киин салайааччыта Саргылаана Никитина иилээн-саҕалаан ыыттылар.
“Ыал – үтүө үгэс ситимэ” диэн бастакы түһүлгэҕэ үс уоллаах, уон сиэннээх Березкиннар дьиэ кэргэн ийэлэрэ уол оҕону иитиигэ уопутун үллэһиннэ. Манна оҕону үлэҕэ, спортка сыһыаран, бэйэлэрин холобурдарынан куһаҕан дьаллыктан туора туттарга иитэллэрин кэпсээтэ. Үс оҕо ийэтэ, уйулҕа үөрэхтээҕэ Таисия Базарова “Ыты дьиэ кэргэн дьарыга оҥостон эппиэтинэстээхтик иитии” диэн тиэмэҕэ кэпсээбитэ эмиэ дьон болҕомтотун тарта. Кинилэр икки ыты докумуоннатан, дьарыктаан, быыстапкаҕа кытыннаран иитэллэрин итиэннэ ыт киһи уйулҕата чөл буоларыгар көмөлөөҕүн, дьиҥ доҕор оҥостон, эппиэтинэстээхтик сыһыаннаһан иитэллэрин холобурдаата.
Элэһин олохтоохторо үс оҕолоох Руслан, Варвара Поповтар тыа сиригэр эдэр ыал олоҕун-дьаһаҕын билиһиннэрдилэр. Дьиэ туттан, дьоннорун кытта отучча ынах сүөһүнү көрөн-истэн олороллорун туһунан сырдаттылар.
Салгыы 13 оҕолоох, ол иһигэр тоҕус оҕону иитэ ылбыт Григорьевтар дьиэ кэргэн ийэлэрэ Саина Егоровна оҕону иитиигэ санааларын үллэһиннэ. Дьиэ кэргэн 25 ынах-сүөһүнү иитэн үлэни, сынньалаҥы дьүөрэлии тутан, сахалыы тылы, үгэһи өрө тутан олороллорун кэпсээтэ. Форум иккис чааһыгар улууспутугар иитиэх оҕолор дьарыктарын, хайдах олороллорун туһунан кэпсиир тэттик киинэ көһүннэ. Оҕону иитэр ыалларга дастабырыанньаны туттардылар.
Форум бу хайысхатыгар барыта 160 киһи кыттыбыта бэлиэтэннэ, бэйэ дьарыктаах 15 хаһаайка бэйэлэрин оҥоһуктарын, астарын-үөллэрин быыстапкалаан көрдөрдүлэр, атыылаатылар, суруйар Мария Аргунова, мюрюгазета.рф
