20 От ыйа 20.07
  • 19°
  • $ 88,02
  • 96,04

Любомир Николаев Чурапчыга кыайыыта (РЕПОРТАЖ)

19:30, 20 июня 2018
Текст:
Читайте нас на
Яндекс Новости
ЯДВ

Сайын ыытыллар саха многоборьеларыттан биир саамай элбэх уонна ыарахан көрүҥнэрдээх күрэхтэһиинэн, Чурапчы улууһун ыһыаҕар ыытыллар Тоҕус Томтор күрэхтэһии буолар. Сорох экспертэр “Дыгын оонньууларыттан” састааба күүстээҕин бэлиэтээтилэр. Бэс ыйын 16-17 күннэригэр Чурапчы Маҕаайы алааһыгар XX-ис үйэ бастыҥ спортсмена аат хаһаайына Степан Алексеев сырдык кэриэһигэр анаммыт Тоҕус Томтор күрэхтэһии бэһис үбүлүөйдээх төгүлүн ыытылынна.

«УАЗ-Патриот» бириис.

Бастакы күн: Николаев, Ноговицын, Попов 

Үбүлүөйдээх Тоҕус Томтор түһүлгэтэ быйыл саха сирин 11 боотурун муста. Күрэхтэһээччилэр 9 араас спорт көрүҥэр ( мас тардыһыытыгар, бэрэмэдэйдээх сүүрүүгэ, оҕунан ытыыга, 400 миэтэрэҕэ сүүрүүгэ, тутум эргииргэ, кулун тардыһыытыгар, үс төгүл үскэ, хапсаҕайга, 106 киилэлээх бэрэбинэни көтөҕүүтэ) киирсэн бастыҥы быһаарсыбыттара. Бастакы күҥҥэ ыытыллыбыт мас тардыһыытыгар Дмитрий Попов холкутук бастаабыта. Бэрэмэдэйдээх сүүрүүгэ Петр Старостин урут сүүрүүнэн анаан эрчиллибит буолан, иннин кимиэхэ да биэрбэтэ. Оҕунан ытыыга Любомир Николаев барыларынааҕар бэргэн ытааччытын дакаастаабыта.

Бастакы күрэхтэһии күнүн түмүктүүр, 400 миэтэрэҕэ сүүрүүгэ бастаан испит Петр Старостин аара атаҕын былчыҥын быһан, куоталаһыыттан туораабытыгар, иккис испит Дьулустан Ноговицын финишкэ бастакынан кэлбитэ. Амма мадьыныта Егор Баишев сүүрүү кэнниттэн эмиэ эчэйии ылан салгыы киирсибэтэ.

Ол курдук, Михаил Павлов (Нам), Семен Аммосов (Чурапчы), Айсен Ботуев (Үөһээ Бүлүү), Дьулустан Ноговицын (Горнай), Любомир Николаев (Үөһээ Бүлүү), Владимир Никитин (Амма), Григорий Барашков (Чурапчы) уонна Айхал Бултясов (Үөһээ Бүлүү) хаалбыт биэс көрүҥҥэ бэйэлэрэ киирсибиттэрэ.

Иккис күн: Дмитрий Попов баҕананы 354 миэтэрэ илтэ

Иккис күҥҥэ биэс көрүҥ хаалбыта. Кулун тардыһыытыгар кыайтарыы диэни билбэтэх Любомир Николаев бу да сырыыга тэҥнээҕин булбата. Кини утарсааччыларын тыраахтар курдук соһоттуурун дьон-сэргэ биһирээбитэ. Тутум эргииргэ өрөспүүбүлүкэ рекордсмена Айсен Ботуев 63 эргиири оҥорон бастаабыта.

Кини үс төгүл үскэ эмиэ иннин кимиэхэ да биэрбэтэ. Уопсай түмүккэ барыларынааҕар аҕа саастаах Любомир Николаев инники тахсыбыта. Кини кэнниттэн Дьулустан Ноговицын, Дмитрий Попов уонна Владимир Никитин араа-бараа сылдьыбыттара. Хапсаҕайга Любомир Николаев төһө да бастаабытын иһин,  Дьулустан Ноговицын уопсай түмүккэ киниэхэ лаппа чугаһаппыта. Барыларынааҕар кыра ыйааһыннаах, Саха сирин аатырбыт ырыаһыта Анна Барашкова төрөппүт уола Григорий Барашков бэйэтинээҕэр быдан улахан дьону охтортоон, иккис миэстэни ылбытын бэлиэтиир тустаахпын. Түмүктүүр көрүҥҥэ, 106 киилэлээх бэрэбинэни илдьиигэ Дьулустааҥҥа сэрэбиэйэ бастакы түбэһэн, туох баарынан 203 миэтэрэни илдьибитэ.

Кини кэнниттэн кыайыыга дьулуурдаах Любомир Николаев баҕананы 317 миэтэрэ илдьэн дьону сөхтөрбүтэ. Оттон Дмитрий Попов Любомир Николаев көрдөрүүтүн анаан эккирэтэн, баҕананы 354 миэтэрэ илдьэн эрэллээхтик бу көрүҥҥэ бастаабыта. Уопсай түмүккэ,  Дмитрий Попов үһүс бочуоттаах миэстэҕэ тиксэн, матассыыкыл хаһаайына буолбута. Иккис буолбут Дьулустан Ноговицын квадроциклынан наҕараадаламмыта. Иккис төгүлүн Тоҕус Томтор кыайыылааҕа ааты сүкпүт Любомир Николаевка УАЗ ПАТРИОТ массыына күлүүһүн туттарбыттара. Көрөөччүлэр биһирэбиллэрин ылбыт Григорий Барашковка уонна Владимир Никитиҥҥэ “Кэшбэри” хампаанньа бэрэстэбиитэлэ Олеся Сосина Дубайга сынньана барар путевкалары туттарбыта.

Николай ПОПОВ, «Саха сирэ» хаһыат, edersaas.ru

1

0
Следите за самым важным и интересным в Telegram-канале и WhatsApp-группе ЯСИА