Горнай улууһун тыа хаһаайыстыбатын салаатыгар сүөһү аһылыгын бэлэмнээһинигэр урбаанньыт Анатолий Лю Фа саҥа хайысханы саҕалаата.
Кулун тутар бүтэһик күннэриттэн Анатолий Лю Фа салайар дьиэ-уот коммунальнай сулууспатын тэрилтэтэ ходуһа сирдэрин, бааһыналары тупсаран оҥорор үлэтин ылыста.
Күн бүгүн улахан кыамталаах грейдер иккис сакааһыгар сылдьар. Сайаапкалар киирэ тураллар диэн салайааччы былаанын үллэстэр. Билигин күҥҥэ 2-2,5 га сирин оҥороллор. Сүрүннээн титириктэн уонна дулҕаттан ыраастыыллар.
Үлэ маннык тэтиминэн бардаҕына, Горнай улууһугар өссө сэбиэскэй былаас сылларыгар холкуостар, сопхуостар күүстэринэн оҥоһуллубут сирдэр чөлүгэр түһүөхтэрэ, суруйда Саха НКИХ.
