“Айсен Николаев эдэр киһи эрээри кини үлэлээн кэлбит суола-ииһэ ураты. Кини үп-харчы да өттүгэр, бырабыыталыстыбаҕа да, киин куораппытын салайыы курдук хаһаайыстыбаннай үлэҕэ да таһаарыылаахтык үлэлээтэ”, — диэн бэлиэтиир Егор Борисов “Саха” НКИХ “Аһаҕас кэпсэтии” биэриитигэр.
edersaas.ru
Санатан эттэххэ, Айсен Сергеевич Үп миниистиринэн, СӨ бэрэсидьиэнин уонна бырабыыталыстыбатын дьаһалтатын салайааччытынан, кэлин Дьокуускай куорат баһылыгынан үлэлээбитэ.
“Өрөспүүбүлүкэ киин куоратын салайыы диэн улахан хаһаайыстыба. Ону барытын кыайа тутан кэллэ. Атын субъектарга куорат уонна регион салалтатын икки ардыгар өйдөспөт быһыы-майгы тахсыталыыр буоллаҕына, биһиги Айсен Сергеевичтыын эйэ-дэмнээхтик, биир сыалы-соругу тутуһан үлэлээн кэллибит”, — диэн этэр Егор Афанасьевич.
Салгыы атын регионнар салайааччыларын туһунан этэригэр: “Бу холобур, Магадаҥҥа Уралтан атын киһини аҕалан олоттулар. Биһиэхэ эмиэ оннук буолуон сөп этэ. Норуоппут түмсүүлээх, биһиги ыытар бэлиитикэбит бигэ туруктаах, биһиги өрөспүүбүлүкэбитигэр сайдыы тэтимэ атыннык көстөр буолан, олохтоох каадырбыт Ил Дархан э.т. анаммыта бу улахан ситиһии. Уонна Айсен Сергеевич бэлиитик быһыытынан үүнэн-сайдан иһэрин көрдөрөр”, — диэн бэлиэтиир кини.
Аграфена КУЗЬМИНА, “саха сирэ” хаһыат.
