Үөһээ Бүлүү улууһугар үгэскэ кубулуйбут муниципальнай тэрээһин нэһилиэктэринэн ыытыллар. Улуус дьаһалтатын 2023 сыллааҕы үлэтин отчуота салҕанар.
Нам нэһилиэгэр улуус дьаһалтатын ааспыт сыллааҕы үлэтин отчуоттуур мунньаҕар нэһилиэк дьокутааттарын Сэбиэтин бэрэссэдээтэлэ Лилия Васильева биэрэги бөҕөргөтүү үлэтин туруоруста. «Биэрэкпит сиҥнэ турар, нэһилиэгинэн ууга барар кутталлаахпыт», — диэтэ кини.
40 — тан тахса сылгылаах Спартак Кардашевскай биэ төбөтүгэр ааспыт сылга көрүллүбүт сууманы чуолкайдаста.
Бэйэтэ атыыласпыт оту дьапталҕалыыр тэрилин ороскуотун улуустааҕы тыа хаһаайыстыбатын департамена төнүннэриэн сөп дуо диэн ыйыталаста.
Намнар барыта 22 киһи мунньахха кыттыыны ыллылар.
Оттон Кэнтиккэ олохтоохтор Бүлүү Эбэни туоруур муоста үлэтэ хаһан саҕаланыай диэн ыйыталастылар. Нэһилиэккэ почта күн ахсын үлэлииригэр баҕарабыт диэн санааларын тиэртилэр. Оптуобус тоҕо сылдьыбатый диэн улуустааҕы социальнай көмүскэл үлэһитэ Надежда Еттянова туоһуласта.
Ааптар: Валентина Догоюсова, «Үөһээ Бүлүү» хаһыат
