Балаҕан ыйын 21 күнүттэн Дьокуускай куорат 5, 9, 10, 11-с кылаастарын үөрэнээччилэрэ оскуолаҕа баран үөрэнэн эрэллэр. Бу иннинэ оскуолаҕа алын сүһүөх үөрэнээччилэрэ үөрэммиттэрэ.
Бу иннинэ Дьокуускай куорат тоҕус оскуолатыгар: 32№-дээх орто оскуола, Техническэй лиссиэй, Кангалаастааҕы, Маҕаннааҕы орто оскуолалар, оҕо айымньытын дьиэтигэр аһыллыбыт маҥнайгы кылаас үөрэнээччилэрэ, 4, 22, 34 №-дээх оскуолалар, 28№-дээх төрөппүт көрүүтэ-истиитэ суох хаалбыт оҕолор оскуол-интэринээтэ балаҕан ыйын 1 күнүттэн уруккулуу үөрэнэн саҕалаабыттара. Балаҕан ыйын 10 күнүттэн очнай үөрэниигэ Табаҕатааҕы оскуола, Марха 1, 2 №-дээх оскуолалара көспүттэрэ.
Билигин дьиэттэн 6, 7, 8 кылаас үөрэнээччилэрэ үөрэнэллэр. Ол эрэн оҕотун хайдах үөрэтэр туһунан бүтэһиктээх быһаарыныыны төрөппүт бэйэтэ ылынар.
«Оскуолаҕа санитарнай-эпидемиологическай ирдэбиллэр бары тутуһуллаллар. Оҕолор сарсыарда аайы термометрияны ааһаллар. Оскуола кыаҕыттан көрөн, кылаастары кыра бөлөхтөргө араараллар. Сорох оскуолаларга араас аанынан сылдьыы тэрилиннэ. Төрөппүттэр оҕолоругар болҕомтолоох буолаллара наада. Оҕо дьаҥнаары гыммыт буоллаҕына оскуолаҕа ыыппат наада», – диир үөрэх управленитетын үлэһитэ Мирослав Афанасьев.
This post was published on 23.09.2020 12:01 12:01