16 От ыйа 16.07
  • 16°
  • $ 87,81
  • 95,78

Дьокуускайга клиническэй балыыһа эндоскопия салаатыгар Виталий Андросов аата иҥэрилиннэ

Читайте нас на
Яндекс Новости
ЯДВ

Уус Алданатан төрүттээх терапевт-быраас, учуонай, преподаватель, уопсастыбаннай диэйэтэл, ону сэргэ олус элбэх уостан түспэт ырыалаах биллэр мелодист Виталий Тимофеевич Андросов сырдык аатын үйэтитэн Дьокуускайга өрөспүүбүлүкэтээҕи клиническэй балыыһа эндоскопия салаатыгар кини аатын иҥэрэн, бэҕэһээ өйдөбүнньүк дуосканы арыйыы долгутуулаах тэрээһинэ буолла. Тэрээһиҥҥэ төрөппүт уола Дмитрий Андросов кыттыыны ылан балыыһа салалтатыгар улахан махталын тиэртэ.

Медицинскэй наука кандидата, ХИФУ мединститутун доцена, Саха Өрөспүүбүлүкэтин доруобуйа харыстабылын туйгуна, киин куоракка доруобуйа харыстабылын бочуоттаах үлэһитэ, Саха Өрөспүүбүлүкэтигэр профессиональнай үөрэхтээһин туйгуна, РФ үрдүк профүөрэхтээһинин бочуоттаах үлэһитэ Виталий Андросов өрөспүүбүлүкэҕэ эндоскопия сулууспата төрүттэниитигэр улахан өҥөлөөх, кинини кэллиэгэлэрэ эндоскопия “пионера” диэн билинэллэр.

Кини 1974 сыллаахха Сибииргэ уонна Уһук Илиҥҥэ бастакылартан биирдэстэринэн эндоскопия чинчийиини баһылаан гастроскопияны практикаҕа киллэрбит, Сэбиэскэй Сойууска эмиэ биир бастакынан фиброэзогастроскопияны профилактическай көрүүлэргэ туһаммыт өрөспүүбүлүкэ бастакы гастроэнтеролога буолар.

Манна эбэн эттэххэ, кини аҕатын Аҕа дойду Улуу сэриитигэр кыттыылааҕа, байыаннай хирург, медицинскэй сулууспа майора Тимофей Сосины Уус Алдаҥҥа хирургия салаатын төрүттээбит киһинэн билинэбит, кини аата улуустааҕы киин балыыһа хирургия салаатыгар иҥэриллибитэ.

Следите за самым важным и интересным в Telegram-канале и WhatsApp-группе ЯСИА
Тутаах тыллар