Бу күннэргэ Дьокуускай куоракка Саха сиригэр аҕыйах ахсааннах төрүт норуоттар Ассоциациялара тэриллибитэ 30 сыллаах үбүлүөйэ буолла. Биир бастакынан Муома оройуона саҕалаата.
Ахсынньы 9 күнүгэр А.Е. Кулаковскай аатынан культура киинигэр Муома оройуонун чемпион табаһыта С.Г. Слепцов 100 саһыгар анаан, табаһыт оҕолоро, ыччата ахтыы киэһэтин тэрийдилэр. Аҕыйах ахсааннаах төрүт норуоттар Саха сиринээҕи Ассоциацияларын Президенин солбуйааччыта В.И. Шадрин, Ассоциация иһинэн кырдьаҕастар түмсүүлэрин салайааччылара А.Д. Марфусалова, аҕыйах ахсааннаах норуоттар бырааптарын көмүскүүр бололмуочунай көмөлөһөөччүтэ Л.В. Христофорова, Саха сирин эбээннэрин Сойууһун салайаааччыта А.П. Степанов – Ламутскай кэлэн, чемпион табаһыт С.Г. Слепцов оҕолорун, ыччатын эҕэрдэлээтилэр, кэс тылларын тиэртилэр.
Ахтыы киэһэтигэр Степан Григорьевич кыргыттара, сиэннэрэ эбээннии ырыаны ыллаан, хоһоон ааҕан, үҥкүүлээн, сээдьэлээн төрүт культураларын пропагандалаан, бары мустубуттар сэҥээриилэрин ыллылар. Бэйэлэрин илиилэринэн айбыт национальнай көстүүмнэрин музыканан доҕуһуоллатан көрдөрбүттэрэ ураты дьоһуннук көһүннэ.
Ахтыы киэһэҕэ Улахан Чыыстай ытык кырдьаҕастара «Бочуот знага» уордьан кавалера И.Е. Слепцов,эбээн тылын өр сылларга үөрэппит бэтэрээн учуутал, СӨ үөрэҕириитин үтүөлээх үлэһитэ А.Д. Слепцова истиҥ иһирэх тылларынан чемпион табаһыт С.Г. Слепцову үгүс үтүө тылларынан ахтан-санаан ыллылар.
Слепцовтар уустара төрүт удьуордарын туһунан кэпсиир хаартысканан-видеонан сюжеттар ыалдьыттар болҕомтолорун тарта. Билигин С.Г. Слепцов аатынан көс таба ыстаадатыгар кини ыччата үлэлиир, эһэлэрин үлэтин салҕыыллар.
Ахтыы киэһэтэ улахан сээдьэ түһүлгэтинэн түмүктэннэ. Слепцовтар мустубут ыалдьыттары эбээн норуотун минньигэс амтаннаах төрүт бүлүүдэлэринэн айах туппуттара, куоракка олорор биир дойдулаахтарын долгута үөртэ, ахта саныыр астарын амсайан дьон–сэргэ улаханнык астынан ахтыы киэһэтин түмүктээтилэр.
Ааптар: Х. Кривошапкина
This post was published on 10.12.2019 16:47 16:47