Үрдүк үөрэххэ киирэр 2020 сылга оскуоланы бүтэрээччилэр, быһа барыллаан, БКЭ-рин атырдьах — балаҕан ыйдарыгар туттарыахтара. Ол туһунан бырабыыталыстыба бэрэссэдээтэлин солбуйааччытын э.т. Сергей Местников эттэ, СИА суруйар.
«Эрдэ этиллибитин курдук, БКЭ-ни туттарыы хойукку болдьоххо көһөрүлүннэ. Быһа барыллаан, атырдьах — балаҕан ыйдара. Чуолкай болдьох өссө биллибэт. Эксээмэн үрдүк үөрэх кыһаларыгар эрэ киирээччилэргэ ананар. Ол аата ким орто анал үөрэххэ туттарсар, БКЭ-ни туттарара булгуччулаах буолбатах, кэлэр үөрэх дьылын бүтүүтэ туттарыахтарын сөп», — диэтэ Сергей Местников.
Кини эппитинэн, быһаарыы түмүктээх буолбатах. Билигин бырабыыталыстыба сокуоннары уонна нуорма аакталарын бэлэмниир, ол кэннэ барыта чуолкайданыаҕа.
Санаттахха, РФ үөрэххэ министиэристибэтэ, коронавирус пандемиятынан сибээстээн, Биир кэлим эксээмэни хойутаан туттарар туһунан быһаарыы ылбыта. Эксээмэни үрдүк үөрэххэ эрэ киирээччилэр туттараллар. Итиэннэ 9 кылаас кэннэ нуучча тылыгар уонна математикаҕа эксээмэн туттарыыта көтүрүллүбүтэ. Оҕолор түмүктүүр сыаналарын сыллааҕы сүрүн көрдөрүүлэринэн ылыахтара.
This post was published on 15.05.2020 11:02 11:02