Ааспыт сыл бүтүүтэ Бүлүү куоратыгар үлэҕэ киирбит икки мэндиэмэннээх баараҕай таас дьиэлээх балыыһаҕа үлэлиир хирургия отделениетыгар Бүлүү, Үөһээ Бүлүү уонна Кэбээйи улуустарын олохтоохторугар медицинэ билиҥҥи өҥөлөрүн оҥорон эрэллэр.
Ханна баҕарар дьон олоҕун таһымын медицинэ сайдыыта быһаарар. Ол эбэтэр, дьон доруобуйа харыстабылын аныгы эмтиир өҥөлөрүнэн төһө туһанар кыахтаахтара олох сайдыытын туоһута буолар.
Билигин өрөспүүбүлүкэ кииниттэн тэйиччи сытар Бүлүү куоратыгар доруобуйа харыстабылын саҥа баараҕай уонна аныгы тутуулаах эбийиэгэ үлэҕэ киирэн, саҥа тэрилинэн хааччыллан,үс улуус олохтоохторо медицинэ билиҥҥи өҥөлөрүнэн туһанан эрэллэр.
Оройуоннааҕы балыыһа салалтатын элбэх тэрийэр үлэтин түмүгэр Бүлүү саҥа балыыһатыгар эмтэнэргэ бары усулуобуйа барыта тэрилиннэ, балыыһа тупсаҕай өттүнэн өрөспүүбүлүкэҕэ биир бастыҥнар ахсааннарыгар киирдэ.
Ыарыһахтар сытар палаталарыгар кондиционер үлэлиир, Интернети көрөргө, социальнай ситимнэринэн чугас дьону кытта алтыһарга оннооҕор Wi-Fi кытта баар. Балыыһа иһэ сырдык, киэҥ-куоҥ көрүдүөрдэрдээх, эмтиир блоктардаах, лифт кытта баар, душ, туалет туһунан этэ да барыллыбат.
Бүлүүгэ балыыһа комплексын бастакы уочарата бүгүҥҥү күннээҕи туругар тиийиэр диэри элбэх хаар түспүтэ, тутуу уһуннук ыытыллыбыта. Тутууну билиһиннэрдэххэ, Бүлүү куоратыгар билиҥҥи кэм ирдэбиллэригэр эппиэттиир балыыһа комплексын тутуутун улуус дьаһалтата, оройуоннааҕы киин балыыһа салалталара, олохтоохтор туруорсубуттара ыраатта. Генеральнай былаан быһыытынан, биир сиргэ балыыһа комплексын икки таас дьиэтэ тутуллара быһаарыллыбыта, бырайыактара оҥоһуллубута, судаарыстыбаннай экспертизаны ааспыттара.
Балыыһа комплексын кэтэһиилээх бастакы уочаратын тутуу 2016 сыллаахха саҕаламмыта.Саха сиригэр элбэх тутууну ыыппыт «Кинг-95» тэрилтэ тендергэ кыайан, сыл иһигэр таас холлоҕоһу тутан таһаарбыта уонна тохтуурга күһэллибитэ. Эбийиэккэ 2020 сыллаахха диэри туох да үлэ барбакка тохтоон турбута, үп суох диэн аатырбыта…
Айсен Николаев Саха Өрөспүүбүлүкэтин Ил Дарханынан талыллан баран, Бүлүү балыыһатын ситэрэргэ улахан болҕомтотун уурбута. Кини тутуута тохтоон турбут эбийиэги «Доруобуйа харыстабыла» федеральнай национальнай бырайыак эрэгийиэннээҕи «2021-2025 сылларга Саха Өрөспүүүлүкэтигэр доруобуйа харыстабылын бастакы сүһүөх звенотун саҥардыы» бырагырааматыгар киллэрэргэ быһаарбыта. Дьэ, онтон ыла балыыһа тутуутун силигин ситэрии үлэтэ саҕаламмыта.
2022 сыл бүтүүтэ саҥа эбийиэк үлэҕэ киириитин үөрүүлээх тэрээһинэ ыытыллыбыта. Эбийиэк үлэҕэ киириитэ улуус уонна оройуоннааҕы балыыһа салалталарыттан элбэх үлэни эрэйбитэ.
Балыыһа комплексын бастакы уочарата үлэҕэ киириитигэр улуус, оройуоннааҕы балыыһа салалталарын туруорсуулара, Ил Түмэн депутаттарын, Бүлүү дьонун этиниилэрэ болҕомтоҕо ылылынна диэххэ сөп.
Бүлүү дьоно-сэргэтэ Айсен Николаевка дьон доруобуйатын тупсарыыга ыытар үлэтигэр, балыыһа тутуутун салгыырга кэмигэр быһаарыы ылбытыгар, медицинэ саҥа өҥөлөрүнэн туһанар кыахтаммыттарыгар, ыраас, сырдык, аныгы дьиэҕэ эмтэнэр буолбутатрыгар махталлара улахан.
1600 кв м иэннээх дьиэҕэ билигин приемнай отделение, барыта 25 куойкалаах хирургия, итини сэргэ, анестезиология уонна реанимация отделениелара, клиника-диагностическай лаборатория, рентген-кабинет, таҥас сууйар, ас астыыр блоктар үлэлииллэр. 8 куойкалаах травматология, 3 куойкалаах гинекология эмиэ хирургия отделениетын иһинэн үлэлииллэр.
Саҥа балыыһаҕа чуолаан ханнык саҥа ньымалары туттан эмтииллэрин оройуоннааҕы киин балыыһа кылаабынай бырааһын солбуйааччы Алевтина Кондакова билиһиннэрдэ:
—Биһиги травматолог быраастарбыт Николай Григорьев уонна Семен Макаров Новосибирскайга эндопротезирование оҥорорго үөрэнэн кэлбиттэрэ уонна үрдүк таһымнаах медицинскэй көмөнү оҥорорго лисиэнсийэ ыллылар.
Акушер-быраас Матрена Григорьева Казань куоракка эндоскопическай эпэрээссийэ ыытарга үөрэнэн кэллэ уонна бастакы уустук эпэрээссийэтин оҥордо.
Билигин хирургия отделениетыгар Бүлүү, Үөһээ Бүлүү уонна Кэбээйи улуустарын олохтоохторугар араас эпэрээссийэлэри оҥороллор. Чугастыы сытар улуустартан эмтэнэргэ усулуобуйата үчүгэй, уопуттаах быраастар, медицинскэй персонал үлэлииллэр диэн ыарыһахтар кэлэ сатыылларын, травматологияҕа суруттаралларын эмчиттэр кэпсииллэр.
Ити курдук, Бүлүү куоратыгар былырыын үлэҕэ киирбит саҥа балыыһа дьиэтигэр ыарыһахтарга эмтэнэллэригэр бары усулуобуйа тэриллибит, эмтээһин саҥа ньымаларын олоххо киллэрэллэр..
2024 сыллаахха тутуута түмүктэниэхтээх балыыһа комплексын иккис уочаратын дьиэтигэр терапия, оҕо отделениелара, «Суһал көмө» уо.д.а. отделениелар үлэлиэхтэрэ диэн былааҥҥа сылдьар.
Николай Куприянов, Олох суола
