Муус устар 4 күнүгэр Үгүлээккэ ыраах сытар Амма уонна Горнай улуустарыттан 25 саха ынаҕын 3 күн айаннаан аҕалбыттарын редакцияҕа Үгүлээт олохтооҕо, кулууп үлэһитэ, учаастактааҕы быыбар хамыыһыйатын бэрэссэдээтэлэ Мария Донская билиһиннэрдэ.
Үгүлээккэ саха ынаҕын боруодатын иитиинэн дьарыктанарга туруммуттара ыраатта — хас да сыллааҕыта саха ынаҕын оҕустарын аҕалбыттара, саҥа хотон туппуттара, саха ынахтарын аҕаларга кэпсэтии ыыппыттара. Саха ынаҕын иитэргэ улуус хоту уһугар сытар Үгүлээт айылҕата сөп түбэһэр.
Биһиэхэ ынах сүөһүбүтүн «сахатыта» сатаабыппыт 5 сылыгар барда, 5 сыллааҕыта 2 саха оҕуһун ылбыппыт, билигин саха аҥардаах ынахтарбыт үүттэрэ хойуу, идэһэ этэ олус минньигэс, — диэн нэһилиэк баһылыга Октябрь Лукин билиһиннэрдэ.
Өрөспүүбүлүкэ ситэриилээх былааһын быйылгы отчуотун кэмигэр Үгүлээккэ тыа хаһаайыстыбатын уонна ас-үөл миниистирин Артем Александрову икки сыллааҕыта саха ынаҕын иитэргэ анаан тутуллубут хотоҥҥо сырытыннарбыттара. Үгүлээт нэһилиэгин баһылыга Октябрь Лукин сотору кэминэн саха ынаҕын аҕаларга кэпсэппиттэрин эппитэ.
Ити кэпсэтии кэннэ икки ый буолаат үгүлээттэр саха ынахтарын саҥа хотонноругар туруордулар. Сайаана диэн ынах массыына кузовын үрдүгэр сүүһүгэр күннээх ньирэйи төрөөбүтэ олохтоохтор үөрүүлэрин үксэттэ, үчүгэй билгэ буолла, Күнчээнэ диэн ааттанна.
Октябрь Лукин сүрдээх үчүгэй көрүҥнээх ньирэй төрөөбүтүн, ийэтин эмиийин эмэн, сэниэ ылан туран эккирээн барда диэн кэпсээтэ. Саха ынахтара Күндэйэ күөх отун сиэн, эбэ ыраас уутун уулаан абыраннылар диир нэһилиэк баһылыга.
Кэлиҥҥи кэмнэргэ Үгүлээт туһунан үөрүүлээх, санааны көтөҕөр информациялар СМИ-гэ киэҥник тарҕаналлар. Санаттахха, соторутааҕыта олохтоох дьаһалта оскуола оҕолорун каникулларын кэмигэр бастыҥ үөрэнээччилэри, СВО-ҕа сылдьар төрөппүтэрдээх оҕолору дойду киин куоратыгар – Москубаҕа босхо сырытыннарбыттара. Тохсунньу ыйга улууска суох балык ыыһыыр оһохтоох, араас суулуур тэриллээх сыаҕы арыйбыттара. Билигин балык ыыһыыр сыах үлэлии турар, бородууксуйатын сорҕотун СВО-ҕа ыытар. Үгүлээт нэһилиэгэ эбэҥки национальнай нэһилиэгэ буоларга үлэтэ эмиэ түмүктээх суолга киирэн эрэр. Саҥа дьыл кэннэ нэһилиэк баһылыга Госдумаҕа тиийэн Саха сириттэн талыллыбыт депутаттары көрсөн кэпсэппитэ.
Ити барыта, олохтоох дьаһалта киэҥ өрүттээх үлэни ыытарын, дьон-сэргэ түмсүүлээҕин көрдөрөр.
Ааптар: Николай Куприянов, «Олох суола» хаһыат
Хаартыскаҕа: Үгүлээт нэһилиэгин баһылыга саҥа төрөөбүт ньирэйи кытта, саха ынахтара, массыына кузовын үрдүгэр төрөөбүт Сайаана ньирэйин кытта.
