Сунтаар улууһугар муус устар 10 күнүнээҕи туругунан, 5611 ынахтан 1663 төрөөтө. Ол аата төрүөх 30% буолла.
Былырыыҥҥы төрүөҕү кытта тэҥнээтэххэ, бу көрдөрүү кыратык улахан (1497). Күн түүн төрүөх уларыйа турар, ахсаана элбиир. Элбэх төрүөҕү Түбэй Дьаархаҥҥа 200, Күндэйэҕэ 120, Элгээйигэ 100-тахса ынах биэрдэ. Ынахтар туруктара үчүгэй.
Биэ төрөөһүнэ саҕаланна. 12 биэ төрөөтө. Сунтаар улууһун тыатын хаһаайыстыбатын салалтата “Биэ төрөөһүнэ саҕаламмытынан, ыттаах дьон ыккытын баайыҥ. Халыҥ хаарга төрөөбүт кулуннарга ыттар кутталы үөскэтэллэр” диэн иһитиннэрдилэр.
Мира Афанасьева, «Сунтаар сонуннара» хаһыат
