Бүгүн, бэс ыйын 30 күнүгэр, өрөспүүбүлүкэҕэ Сардаана сибэкки күнэ бэлиэтэнэр. 2010 сыллаахха «Ийэ айылҕаны таптыаҕыҥ уонна харыстыаҕыҥ» диэн Саха сирин көхтөөх дьонун этиитин салалта өйөөн, дьиҥ таһымнаахтык бэлиэтэнэр буолбута.
«Сардаана күнэ — 30.06» уопсастыбаннай тэрилтэ оччолорго бэлиэтээбитинэн, сардаана сибэкки Саха Өрөспүүбүлүкэтин үүнээйилэриттэн саамай кэрэ көстүүлээхтэрэ, онон өҥүрүк куйаастаах дойдубут брендэ буолуон сөптөөх.
Сибэкки Саха сирин үүнээйилэрин Кыһыл кинигэтигэр киллэриллибитэ. Ол аата аар тайҕа киэҥ туонатыгар үүнэн чэлгийэн турар сардааналары үргүүр бобуулаах. Ити эрээри бу кэрэ көстүүгэ тапталы бохсубат, төттөрүтүн таптыырга уонна элбэтэн үүннэрэргэ туһулуур.
«Сайын буолла да, тиэргэн аайы чэлгийэ, ыраахтан киһи хараҕын үөрдэ турар Сардаана сибэкки — таптал бэлиэтэ буолар«, — диэн олохтоохтор кэпсииллэр.
Улуустарга, куораттарга дьон сөбүлээн олордор. Сунтаар улууһун Хадан нэһилиэгэр Кириллиннэр дьиэ кэргэттэрэ 25 сыл анараа өттүгэр биир устуука олордубут сардааналара, билигин тиэргэни толордо. Харах үөрэр, сүрэх дьоллонор.
This post was published on 30.06.2020 15:12 15:12