20 От ыйа 20.07
  • 17°
  • $ 88,02
  • 96,04

Александр Жирков: Балыыһа олохтоохтор сөбүлэҥнэрэ суох сабыллыа суохтаах

12:14, 29 марта 2016
Текст:
Читайте нас на
Яндекс Новости
ЯДВ

Өрөспүүбүлүкэ Ил Түмэнин уонна Госдума депутаттарын холбоһуктаах туруорсуута бастакы ааҕыыны ааста.


Соторутааҕыта Ил Түмэн Государственнай Дума депутаттарын кытта кыттыһан киллэрбит өссө биир сокуонун барыла Дума пленарнай мунньаҕар көрүллэн, бастакы ааҕыыны биир санаанан ааста. Сокуон ис хоһоонун, Думаҕа көрүллүүтүн туһунан Саха Өрөспүүбүлүкэтин парламенын бэрэссэдээтэлэ Александр Жирков бу курдук бэлиэтээн эттэ:

Госдумаҕа көрүллүбүт сокуон аата уһун, онтон ис хоһооно судургу уонна биһиэхэ, Саха сирин олохтоохторугар, ордук тыа сиригэр балайда көмөлөөх, суолталаах. Бу сокуон барыла бүтэһиктээхтик ылылыннаҕына, аны эмп тэрилтэлэрин бу түөлбэҕэ, нэһилиэккэ олохтоох дьон сөбүлэҥэ суох сабан, көһөрөн кэбиһэр бобуллуоҕа. Ити билиҥҥи ыарахан кэмҥэ тыа сиригэр балыыһалары, эмп-томп тэрилтэлэрин чөл тутан хааларга, үбүлүүргэ көмөлөөх буолуоҕа.
Өйдүүргүт буолуо, урукку өттүгэр маныаха маарынныыр дьаһалы үөрэх тэрилтэлэригэр ылынан турабыт. Бастаан өрөспүүбүлүкэҕэ, онтон Россия Федерациятыгар «Үөрэх туһунан» федеральнай сокуон иһигэр киллэрэн. Билигин итинник көннөрүүлэри доруобуйа харыстабылын уонна култуура эйгэтигэр киллэрэр сорук турар. Ону ааһан маннык, аҕыйах ахсааннаах түөлбэлэр, нэһилиэктэр балыыһаларын, оскуолаларын, култуура тэрилтэлэрин көмүскүүр сокуону салгыы дириҥэтэн иһиэхтээхпит. Холобур, ити тэрилтэлэрдээх бөһүөлэктэр икки ардылара ыраах (төһө ыраах буолуохтааҕын сокуоҥҥа суруйуохха сөп) буоллаҕына, ол тэрилтэлэр булгуччу баар буолуохтаахтарын, үбүлэниэхтээхтэрин сокуонунан мэктиэлээһин. Итиниэхэ Госдумаҕа өйүүр дьон ахсаана кэнники кэмҥэ эбиллэн иһэр курдук. Сотору Госдумаҕа саҥа депутаттар кэлиэхтэрэ. Олор ортолоругар дьон-сэргэ тутаах кыһалҕатын таба өйдүүр дьон элбэх буоларыгар баҕалаахпыт.
Ил Түмэн ылыммыт хайысхатын уларытыа суоҕа. Госдумаҕа саҥа сокуоннар барылларын аһарарга Дума депутаттарын, сенатордары бэйэлэрин кытыаран, холбоһон үлэлиир ордук кыайыылаах, соҕотох парламент туруорсарынааҕар. Онон Россия Федеральнай Мунньаҕын кытта өрөспүүбүлүкэҕэ туһалаах өттүгэр бииргэ үлэлээһин салҕанан барыах тустаах.

Источник: Ил Түмэн пресс-сулууспата

Следите за самым важным и интересным в Telegram-канале и WhatsApp-группе ЯСИА