“Үтүө санаа долбуура” аахсыйа элбэх оҕолоох ыалларга уонна кырдьаҕас дьоҥҥо бу сыл тохсунньу ыйыттан күүс-көмө буолар. Аахсыйаны төрүттээччи эдэр предприниматель Петр Черкашин аан бастаан бэйэтин төрөөбүт нэһилиэгэр Өктөмҥө бу үтүө хамсааһыны саҕалаабыта.
“Үтүө санаа долбуура” диэн аахсыйаны бу 2018 сыл саҕаланыытыттан, тохсунньу ыйтан саҕалаабытым. Биһиги элбэх оҕолоох ыалларга уонна аҕа саастаах кырдьаҕастарга күүс-көмө буолабыт. Бүгүҥҥү күҥҥэ элбэх үтүө көмөнү оҥордубут, миэхэ үтүө санаалаах Сахабыт сирин биллэр-көстөр дьоно-сэргэтэ көмө буолаллар. Ол курдук, тустууга Азия чөмпүйүөнэ Айаал Лазарев, ШВСМ дириэктэрин солбуйааччы Леонид Спиридонов, саха норуотун эрэлэ, сүүрүк кыыспыт Сардаана Трофимова, Дыгын оонньууларын кыайыылаахтара Иван Белолюбский, Егор Филиппов, Сахабыт сиригэр кроссфит диэн спорт көрүҥүн төрүттээччи Максим Тихонов, “Snow voice” бөлөх, “Мисс Якутия” Олеся Кондакова-Захарова, «Visconti» маҕаһыын уонна да элбэх амарах санаалаах биллэр дьон үтүө кылааттарын оҥороллор. Билигин «ПОЛКА ДОБРА» диэн ааппытын сахалыы тыыннаан «ҮТҮӨ САНАА ДОЛБУУРА” диэн ааттаатым. Уонна бу үтүө аахсыйаны өйөөн, Уус-Алдан Тумул бөһүөлэгин аҕа баһылыга Алексеев Василий Петрович бэйэтин дьонугар-сэргэтигэр көмө оҥорон “Үтүө санаа долбуурун” арыҋбыта уонна ол үтүө хамсааһына этэҥҥэ үлэлии турар. Муус устар 10 күнүгэр Мэҥэ Хаҥалас Нөөрүктээйи нэһилиэгэр Илларионова Зоя Владимировна диэн үтүө санаалаах кыыс эмиэ холобур оҥостон, нэһилиэгим дьонугар көмөлөһүөм этэ диэн сыалтан «ҮТҮӨ САНАА» долбуура арыйбыта”, – диэн кэпсээтэ Петр Черкашин.
Афанасий НОЕВ, edersaas.ru
