Саха сиригэр «Земскэй доктор» бырагырааманан мэдиссиинэ эйгэтигэр үлэлээччилэргэ бэриллэр суума кээмэйэ 2 мөл солк тириэрдилиннэ. Маннык быһаарыыны регион баһылыга Айсен Николаев ылла. Ыйаах муус устар 6 күнүгэр баттанна.
Эрдэтээҥи быһаарыынан «земскэй доктордар» 1 мөл солк ылаллара. Билигин биир кэмнээх компенсациялыыр төлөбүр кээмэйэ — 2 мөл солк тэҥнэстэ.
Ыйаахха этиллэринэн, куораттыҥы тииптээх бөһүөлэктэргэ, сэлиэнньэлэргэ, оробуочай бөһүөлэктэргэ үлэлии тиийбит быраастар — 2 мөл солк, фельдшердар — 1 мөл солк ылыахтара. Онтон 50 тыһыынчаҕа диэри нэһилиэнньэллэх пууннарга үлэлиир быраастарга 1 мөл солк, фельдшердарга 500 тыһ солк бэриллэр. Компенсация дуогабар баттаммыт күнүттэн 30 хонук иһигэр тиксэриллэр.
Соторутааҕыта «земскэй доктор» сааһыгар хааччахтааһын сотуллубута. Урукку өттүгэр 50 саастарыгар диэри саастаахтар эрэ бырагыраамаҕа кыттар бырааптаахтара, билигин биэнсийэлээх да быраас, үлэ ирдэбиллэригэр эппиэттиир буоллаҕына, дуогабар түһэрсэр кыахтаах. Ол туһунан Владимир Путин Федеральнайдааҕы Мунньахха этэн турар.
