Сайыҥҥы бастакы күн, бэс ыйын 1 күнүгэр, Дьокуускайга Ленин болуоссатыгар Оҕо көмүскэлин күнүн өрөгөйдөөх бырааһынньыга тэрилиннэ. Куорат кырачаан дьонун мэр Айсен Николаев, «Россия Ийэлэрэ» Россиятааҕы уопсастыбаннай тэрилтэ Саха сиринээҕи салаатын салайааччыта Прасковья Борисова уонна «Олох бырааһынньыга» аһымал фонда дириэктэрэ Алена Атласова эҕэрдэлээтилэр. 


«Оҕо көмүскэлин күнэ биһиэхэ улахан дьоҥҥо кинилэр инники сайдыыларыгар улахан эппиэтинэһи сүгэрбитин өссө биирдэ санатар. Биһиги сүрүн сорукпут — оҕо талаанын арыйарыгар, бэйэтин күүһүн боруобаланан көрөрүгэр кыаҕы биэрии. Дьоллоох уонна кыһалҕата суох оҕо сааһы баҕарабын. Бүгүн куорат фонтанын эһиэхэ анаан арыйабыт», — диэтэ баһылык Айсен Николаев.

Үөрүүлээх күҥҥэ Прасковья Борисова муус устар 25 күнүттэн ыам ыйын 5 күнүгэр диэри Сочи куоракка ыытыллыбыт «Биһиги бииргэ» диэн ырыа, үҥкүү инклюзивнай бэстибээлгэ кытттыбыттарга махтал суруктары туттарда. «Биһиги хас биирдии оҕо дьылҕатыгар эппиэтинэһи сүгэбит. Биһиги тэрилтэбит төрөппүт эппиэтинэстээх буолуутугар өрөспүүбүлүкэтээҕи сокуону көҕүлээччилэринэн буолбуппут. Бу сокуон төрөппүттэр оҕолорун иитиилэригэр бэйэлэрин бырааптарын уонна эбээһинэстэрин билэллэригэр, толороллоругар туһалыаҕа», — диэн эттэ кини.

«Олох бырааһынньыга» фонда бэйэтин 15 сылыгар анаан куорат дьаһалтатын кытта «Мөлүйүөн сүрэх» диэн аһымал акциятын саҕалаабыта. «Бу араас киэптээх, көрүҥнээх сүрэҕи оҥоруу куонкуруһа. Онкологическай ыарыылаах оҕолору өйүүр сыаллаах ыытыллар. Бастакынан Дьокуускай куорат дьыссааттара өйөөбүттэрэ. Куонкурус түмүгэ 2016 сыл ахсынньытыгар тахсыаҕа. Биһиги сүрэхтэрбитин холбоон, оҕолорбут санааларын күүһүн бөҕөргөтөн, кыайыылаах буолалларыгар көмөлөһүөхтээхпит», — диэн СИА-ҕа Алена Атласова кэпсээтэ.

0
0
comments powered by HyperComments