Тыа сиригэр эдэр исписэлиистэри олохсутар сыаллаах онлайн-көрсүһүүгэ муниципалитеттар 117 вакансияны көрдөрдүлэр. Университеты бүтэрээччилэри кытта Абый, Өлөөн, Эбээн Бытантай, Эдьигээн, Алдан оройуоттарын бэрэстэбиитэллэрэ көрүстүлэр, СИА-ҕа тустаах үөрэх кыһатыгар эттилэр.
Быйыл ХИФУ-ну Абыйтан 17 устудьуон бүтэрэр. «Төрөөбүт дойдугут эһигини ыҥырар. Улуус сайдар кэскиллээх: 2023 сылга оптика сибээһэ тардыллыахтаах, авиабилиэт субсидияланар, таас оскуола тутуута быйыл саҕаланар. Экологиябыт ыраас. Бу киһи доруобуйатыгар саамай кылаабынайа. Биһиэхэ үс терапевт, психиатр-нарколог, сэттэ учуутал, култуура үлэһиттэрэ наадалар», – диэтэ улуус баһылыгын бастакы солбуйааччыта Владимир Слепцов.
Арктикаҕа кадр элбэҕи быһаарар: үөрэх хаачыстыбата, оҕо үөрэххэ киириитэ, оройуон сайдыыта, диэн бэлиэтээтэ Өлөөннөөҕү үөрэх управлениетын начаалынньыга Мария Иванова. «Эдэр исписэлиис үлэлииригэр усулуобуйа баар. Физик уонна информатик наада. 23 чаас ноҕуруускалаах. Технология учуутала эмиэ ирдэнэр. «Земский учитель» бырагырааманан куурус ааспыппыт. Биһиэхэ үлэлии кэлиҥ», – диэтэ кини.
Абый улууһа — 22, Алдан – 64, Эдьигээн – 13, Өлөөн – 10, Эбээн Бытантай – 8 вакансияны билиһиннэрдилэр.
