Үөһээ Бүлүү улууһун Хомустаах нэһилиэгэр оһуохайдьыт Андрей Титаров төрөөбүт алааһыгар кини боруонса бюһун туруордулар. Итиэннэ кыһын Андрей Титович аатынан өрөспүүбүлүкэтээҕи оһуохай күрэҕин Үөһээ Бүлүүгэ ыытарга диэн кэпсэттилэр.
Бэс ыйын 30 күнүгэр Хомустаахха Андрей Титович Титаров төрөөбүтэ 100 сылыгар аналлаах ыһыах буолла. Саха норуотун бырааһынньыгар улуус баһылыга Владимир Поскачин, Дьокуускай куорат мэра Айсен Николаев, Андрей Титаров аймахтара-уруулара, доҕотторо муһуннулар.
Оһуохайдьыт, олоҥхоһут, норуот эмчитэ, айылҕаттан айдарыылаах, уот сэриини ааспыт буойун, оройуон үтүөлээх бэтэринээрэ, ытыктанар киһи Андрей Титович Титаров үйэ анараа өттүгэр Хомустаахха төрөөбүтэ.
«Андрей Титаров үгүс киһини оһуохай маастарыстыбатыгар уһуйбута, бүгүҥҥү маастардар наставниктара этэ, төрүт култуура олохтоноругар, сириэдийэригэр улахан кылаатын киллэрсибитэ. Кини курдук дьон үөскээн-төрөөн, дойдулара сайдарын туһугар олохторун анаабыт буолан, Үөһээ Бүлүүгэ саха норуотун култууратын чыпчаала баар. Билигин биһиги Манчаары Оонньууларын көрсө биир сомоҕо буолан, муҥутуур кыахпытынан, күүспүтүнэн тэрийиэхтээхпит«, — диэтэ Владимир Поскачин.
Мэҥэ Бэлиэни бастаан улуус киинигэр туруорары былааннаан баран, кини төрөөбүт дойдутун туһугар оҥорбут үтүөлэрин, үлэтин-хамнаһын сыаналаан, киинин быспыт Хомустааҕар дьэндэтэри сөптөөҕүнэн аахпыттар. Кыыһа Тамара Николаева ыһыах олус тэрээһиннээҕин бэлиэтээтэ. «Биһиги дьиэ кэргэн аатыттан улуус, нэһилиэк салалталарыгар биһиги Ытык киһибитин үйэтитэр үлэни ыыталларыгар махтанабын», — диэтэ.
Куорат баһылыга, Андрей Титаров сиэнэ Айсен Николаев үөһээ бүлүүлэр олус күүстээх оһуохайдьыттардаахтарынан биллэллэрин бэлиэтээн эттэ. «Үөһээ бүлүүлэр оһуохай уонна олоҥхо чыпчаалыгар өрөспүүбүлүкэҕэ бастыҥнар кэккэлэригэр сылдьаллар. Туймаада туонатын Улуу тунах ыһыаҕар Дүллүкүттэн төрүттээх Валентина Семенова оһуохай Аан Дархан этээччитэ буолбута үгүһү этэр. Биһиги эһэбит Андрей Титович оҥорбут үтүөтэ таах хаалбатаҕыттан, ситэриллэн, эдэр көлүөнэҕэ салгыы тириэрдиллэн иһэриттэн, салҕанан бара турарынан киэн туттабын«, — диэтэ.
Биир дойдулаахтара Андрей Титович сырдык аатыгар махтаналларын биллэрэн Сэргэ туруордулар.
Бу күн үйэ чаҕылхай лидерин аатын үйэтитэр, кэнчээри ыччакка билиһиннэрэр сыаллаах ветеринардар куонкурустара уонна оһуохай күрэҕэ ыытылынна. Аан Дархан аатын Николай Корякин ылла.
