Бүгүн, алтынньы ый 7 күнүгэр, Дьааңыттан оҕолор Дьокуускайдаатылар. Оҕолор «Сосновый бор» лааҕырга олорон сарсыңңыттан саҕалаан, 28-ка диэри «Цифровое поколение» сменатыгар «Кадры для цифрофой экономики» федеральнайдааҕы бырайыакка кыттыахтара. «Дискретная математика», «Информатика», «Цифровая технология» үөрэниэхтэрэ.
Дьааҥы улууһун Баатаҕайыттан, Боруулаахтан, Адыаччыттан, Верхоянскай куораттан үөрэнээччилэр өрөспүүбүлүкэ киинигэр тиийэн федеральнайдааҕы бырайыак сүнньүнэн үөрэнэн элбэҕи билиэхтэрэ.
Дьааңытааҕы үөрэҕирии салалтатын оҕо сайыңңы сынньалаңар сүрүн исписэлиис Мария Васильевна Коколова оҕолор барыыларын-кэлиилэрин тэрийэр.
Васильева Каролина, Баатаҕай орто оскуолатын 8 кылааһын үөрэнээччитэ: «Маннык хайысханан үлэлиир лааҕырга бастакыбын үөрэнэ баран эрэбин. Элбэҕи билиэхпит, үөрэниэхпит диэн эрэллээхпин».
Наташа Стручкова, Адыаччы орто оскуолатын 11 кылааһын үөрэнээччитэ: «Мин математика, информатика уонна цифровая технология» диэн аныгы ирдэбил саңа көрүңнэригэр үөрэнэ барарбыттан долгуйа үөрэбин. Оскуолам миигин ыыппыттарыгар махтанабын».
Оҕолор барар, кэлэр айаннарын үөрэх управлениета уйунар, сайыңңы сынньалаң уонна оҕо доруобуйатын тупсарыы үбүттэн төлөннө.
Ааптар: Раиса ЧИРИКОВА, Дьааҥы улууһа
