Бүгүн Владимир Путин Пхенчханнааҕы Олимпиадаҕа кыттар спортсменнары кытта көрсүһүөҕэ

0
112

Тохсунньу 31 күнүгэр “Новогорскай” үөрэнэр-эрчиллэр кииҥҥэ Арассыыйа бэрэсидьиэнэ Владимир Путин Соҕуруу Корея Пхенчхан куоратыгар ыытыллар кыһыҥҥы XXIII Олимпийскай оонньууларга кыттар спортсменнары кытта көрсүһүөҕэ. Бу туһунан бүгүн Кремль пресс-сулууспата иһитиннэрдэ.


Аан дойдутааҕы олимпийскай кэмитиэт “Арассыыйаттан сылдьар олимпиец-спортсмен” аатынан 169 спортсмен кыттарын көҥүллээбитэ. Ыҥырыллыбыттар испииһэктэригэр Виктор Ан (шорт-трек), Антон Шипулин (биатлон), Сергей Устюгов(хайыһар) курдук дойду бастыҥ спортменнара киллэриллибэтэхтэрэ.

Бэҕэһээ Владимир Путин итэҕэллээх дьоннорун кытта көрсүһүүтүгэр Арассыыйа спортсменнарын допиҥҥа буруйдааһын туһунан этэригэр, элбэх национальностаах норуот спорка ситиһиилэрэ сорох-сорохторго утуйар ууларын уйгуурдарын, ол биир көстүүтүнэн Арассыыйаны Олимпиадаттан туоратыы буоларын ыйда.

Судаарыстыба баһылыга Арассыыйаҕа допины туттуу түбэлтэлэрэ таһаарыллыбыттарын билинэн туран, атын дойдуларга маннык көстүү эмиэ баарын, олору чорбото, кэпсии-ипсии сатаабаттарын эттэ. Ону кытары спортсменнарбыт МОК быраабылатын тутуһуохтаахтарын чорботон бэлиэтээтэ.

Владимир Путин Москватааҕы допины утарар лаборатория урукку салайааччытын, Допины утарар аан дойдутааҕы ааҕыныстыба (WADA) информаторын Григорий Родченковы аһаҕастык “аҥаланан” ааттаан туран, кини курдук киһи дуоһунаска тиксиэхтээҕэр, сокуону кэспитинэн, түрмэҕэ олоруохтааҕын эттэ. Салгыы Владимир Путин Арассыыйа инникитин даҕаны аан дойдутааҕы олимпийскай кэмитиэти кытта бииргэ үлэлиэҕин эрэннэрдэ, спорду, олимпийскай хамсааһыны “бэлиитикэ кирдээх куухунатыгар” кубулуппаттарыгар ыҥырда.

Санатар буоллахха, кыһыҥҥы XXIII Олимпийскай оонньуулар олунньу 9 –25 күннэригэр ыытыллыахтара.

0
0