25 От ыйа 25.07
  • 24°
  • $ 86,55
  • 94,38

Владимир Пучков: «Федеральнай көмө кэлиэҕэ»

19:04, 15 мая 2018
Текст:
Читайте нас на
Яндекс Новости
ЯДВ

Бэҕэһээ РФ Ыксаллаах быһыыга-майгыга миниистирин э.т. Владимир Пучков Саха сиригэр кэлэн үлэлээтэ. Мунньах кэмигэр Ил Дархан Егор Борисов өрөспүүбүлүкэҕэ халаан уутуттан үгүс хоромньу тахсыбытыттан ыксаллаах быһыыны-майгыны федеральнай таһымҥа таһаарарга эппит этиитин өйөөтө.


“Ил Дархан Егор Борисов федеральнай таһымҥа ыксаллаах быһыыны-майгыны биллэрэргэ диэн этиитин өйүүбүн. Онон Саха сирин ыксаллаах быһыыга-майгыга хамыыһыйата эбии дьаһаллары ылынан, ууга барбыт улуустарга үлэни күүһүрдүҥ, оробуочай бөлөхтөрү элбэтиҥ. Ыксаллаах быһыыга-майгыга туһаныллар туох баар систиэмэни барытын туһаныҥ. Ханна куттал суоһуур чинчилээх да, онно үлэни күүскэ тэрийиҥ. Билигин өссө халаан уутун иккис, үһүс түһүмэҕэ кэлиэҕэ”, — диэн этэр кини.
Аммаҕа нэһилиэнньэни кытары көрсүһүү кэнниттэн биирдиилээн дьон кыһалҕатын туруорсуута элбэҕин, нэһилиэнньэни кытары аадырыстаах үлэни ыытары болҕомто киинигэр тута сылдьарга эттэ. Ону таһынан халаан уутун содулун туоратыыга инникитин элбэх үлэ күүтэрин бэлиэтээтэ.
“Хас биирдии социальнай инфраструктура чөлүгэр түһэриллиэхтээх, энергетика, сибээс, коммунальнай хаһаайыстыба буоллун барыта. Билигин ханна ититии наада да, онно ититии сезонун уһатан биэрэр сөп. Дьиэни-уоту өрө тардары, куурдары таһынан, аһы-үөлү, сыана боппуруоһун, эминэн-томунан хааччыллыыны, сүөһү аһылыгын барытын көрүөххэ, тириэрдиэххэ. Мин санаабар, ити боппуруостарга региоҥҥа тэрээһиннээх үлэ ыытыллар”, — диэн бэлиэтиир Владимир Андреевич.
Оттон ууга барбыттарга көмө туһунан: “Ууга барбыттарга Россия резервэтин фондатыттан көмө харчы көрүллүөҕэ, дьоннор кылгас кэмҥэ олорор сирдэригэр харчыны ылыахтара. Онон сөптөөх докумуону суһаллык оҥоро осхон киллэриҥ”, — диэн эттэ.
Түмүккэ ыксаллаах быһыы-майгы салайааччыта региоҥҥа сүрдээх улахан үлэ ыытыллыбытын, ыксаллаах быһыыга-майгыга киирбит боппуруостар суһаллык тута быһаарыллыбыттарын, Саха сирин ыксаллаах быһыыга-майгыга хамыыһыйата, муниципальнай, регионнааҕы былаастар үлэни биир кэлимник тэрийэн, үчүгэйдик ыыппыттарын бэлиэтээтэ.

Аграфена КУЗЬМИНА, edersaas.ru

Следите за самым важным и интересным в Telegram-канале и WhatsApp-группе ЯСИА