Бэҕэһээ, ыам ыйын 19 күнүгэр, ЦСКА ЛФК-гар Поддубнай Тустуу Лигатын бастакы турнирыгар бастакы уонна финальнай киирсиилэрэ буоллулар. Көҥүл тустуу бары ыйааһыннарыгар финалистар быһаарылыннылар. Лига көмүс мэтээлин иһин киирсээччилэриттэн биирдэстэрэ саха тустуута Виктор Рассадин буолла, диэн Спорт Якутии иһитиннэрэр.
Аны Виктор полуфиналга Красноярскайтан сылдьар Руслан Жендаевы кытта киирсиэхтээх, бу спортсмен Дагестантан сылдьар Европа чемпионун Курбан Шираевы 4:2 ахсааннаах кыайда. Көҥүл тустууга финальнай хапсыһыылар Москва бириэмэтинэн саҕаланыахтара.
Ону тэҥэ, Поддубнай лигатыгар Беларусь сүүмэрдэммит хамаандатыгар баар саха легионердарын көрдүбүт. Арыйаан Тютрин 57 кг диэри ыйааһыҥҥа бастакы эргииргэ Баир Баяндуевы 6:2 кыайда. Онтон тыҥааһыннаах киирсиигэ Арассыыйа чемпиона Рамиз Гамзатовка иккис периодка хоттордо.
65 кг диэри ыйааһыҥҥа Ньургун Скрябин Тываттан аан дойду чемпионатын призерун Кежик Чымбаевы кытта киирсэн бүтэһик сөкүүндэлэргэ 12:12 ахсаанынан кыайда. Иккис киирсиитигэр Ибрагим Абдурахмановка 0:5 ахсаанынан хотторон кэбистэ. 61 кг ыйааһыҥҥа диэри Андрей Бекренев Арассыыйа чемпионатын финалиһыгар Муслим Мехтихановка (4:14) хоттордо.
