Усуйаана ыраах сытар уонна куһаҕан суоллаах-иистээх сирдэригэр Россия бэрэсидьиэнин быыбарыгар болдьоҕун иннинэ куоластааһын саҕаланна.
Кулун тутар 6 күнүнээҕи туругунан, Уйаандьы нэһилиэгин табаһыттара уонна “Янолово” ХЭТ Тарыҥ Үрэхтээҕи хайа үлэһиттэрэ болдьоҕун иннинэ быыбардаатылар.
Эрдэ куоластааһын Казачьеҕа, Тумакка, Сайылыкка, Хайырга салҕаныаҕа, манна баар табаһыттар биригээдэлэригэр тиийиэхтэрэ.
“Арктическай” 617 №-дээх быыбардыыр хамыыһыйа бэрэссэдээтэлэ Александр Светленко уонна хамыыһыйа чилиэннэрэ вертолетунан Тарыҥ Үрэххэ баар көмүс хостооччуларга тиийбиттэрэ. Кулун тутар 6 күнүгэр 28 киһи куоластаабыта.
Уйаандьытааҕы быыбардыыр хамыыһыйа чилиэннэрэ 10 №-дээх табаһыттар биригээдэлэригэр бураннарынан сырыттылар. Алта табаһыт куоластаата.
