Көрсүһүүгэ 60-тан тахса дьахтар сырытта. Алексей Дьячковскай эдэр, эрчимнээх, салайар үлэҕэ дьоҕурдаах салайааччы Айсен Николаевы өйүүргэ бары уопсастыбаннай түмсүүлэр күүстэрин холбуур сорук турарын бэлиэтээтэ.
Мунньахха араас уопсастыбаннай тэрилтэлэртэн кыттыбыт дьахталлар Айсен Николаевы өйүүллэрин биллэрдилэр. Үгүстэр өрөспүүбүлүкэ оройуоннарыгар, куораттарыгар, нэһилиэктэригэр тиийэн, Айсен Николаев быыбар иннинээҕи бырагырааматын билиһиннэрэргэ, быһаарарга бэлэмнэрин биллэрдилэр.
— СӨ Дьахталларын уопсастыбаннай тэрилтэлэрин сойуустара үс суолталаах докумуоҥҥа: өрөспүүбүлүкэ дьахталларын XIV сийиэһин резолюциятыгар, РФ бырабыыталыстыбатын дойдуга Оҕо саас 10 сылын ыытыы дьаһалыгар, 2021 сылга диэри дьахталлар интэриэстэрин туһугар РФ национальнай стратегиятыгар олоҕуран үлэлиибит. Биһиги уопсастыбаннай үлэбит сүрүн тутула – дьиэ кэргэн бэлиитикэтигэр туһуламмыт араас кэскиллээх хайысхалаах үлэни тэрийии.
Ил Дархан дуоһунаһыгар хандьыдаат быыбар иннинээҕи бырагырааматыгар бу боппуруостар бары хабыллыбыттар. Биһиги, уопсастыбанньык дьахталлар, Айсен Николаевы, биллэн турар, өйүүбүт, — диэн санаатын тиэртэ өрөспүүбүлүкэтээҕи дьахталлар уопсастыбаннай тэрилтэлэрин сойуустарын бэрэссэдээтэлэ Анжелика Андреева.
Саха дьахталларын лиидэрэ былырыын РФ Дьахталларын сойууһун бюротугар чилиэнинэн киирбитэ. Бу бочуоттаах уонна эппиэтинэстээх салааҕа Арассыыйа бөдөҥ эрэгийиэннэриттэн бэйэлэрин үлэлэринэн инники сылдьар дьахталлар уопсастыбаннай тэрилтэлэрин сойуустарын салайааччыларын киллэрбиттэрэ.
Онон Анжелика Андреева салайар Саха сирин уопсастыбанньык дьахталларын сойууһа Айсен Николаев быыбарга кыттыытыгар төһүү өйөбүлүнэн буолуохтара.
Анжелика АЛЕКСЕЕВА, «Саха сирэ» хаһыат, edersaas.ru
