Уһук Илиҥҥэ гектар сири босхо биэрэр национальнай бырайыак сотору саҥа таһымҥа тахсар. Уһуку Илини сайыннарыы министиэристибэтигэр этэллэринэн, бу чэрчитинэн сири ылбыт дьоҥҥо эбии өйөбүл үөскэтиллэр.
«Холобур, киһи бу ылбыт сирин тыа хаһаайыстыбатыгар анаан туттар буоллаҕына, бу салаа тиэхиньикэтин лизинг нөҥүө атыылаһар эбэтэр эбии аһылыгы ыларыгар субсидиянан туһаныан сөп. Итини таһынан регион сирэ эбии бэриллэр туһунан көҕүлээһини билигин ырыта сылдьабыт», — диир биэдэмистибэ баһылыгын солбуйааччы Сергей Качаев.
Бырайыак федеральнай киин таһымыгар өйөнөр. Ол курдук, манна хабыллар инфраструктура эбийиэктэрэ судаарыстыба тус сыаллаах бырагыраамаларыгар киириэхтэрэ.
«Маннык уонна маныаха майгынныыр атын бырайыак аан дойдуга ханна да суох. Бүгүҥҥү туругунан Уһук Илин регионнарын эрэ олохтоохторо бу быраабынан туһаналлар, оттон 2017 сыл олунньу 1 күнүттэн дойду дьоно барыта манна кыттыһар», — диир Качаев.
