Быйыл саас норуот синоптига Тускул уратылаах сайын буолуо диэбитэ кэлэн эрэр.
Бу туһунан кини «Тэтим» араадьыйаҕа күнү-дьылы билгэлээһинигэр кэпсээтэ.
— Быйыл күн муҥутуур элбэх эстиилээх сыла. Онон бу сайын муҥутаан сылыйыахтаах. Ааспыт ыйга Уралга, Сибииргэ +40 кыраадыстаах куйаас бэлиэтэммитэ. Аны билигин Саха сирин уочарата кэллэ. Чукотка, Магадан, Саха сирэ сайыҥҥы нуорматтан 6-8 кыраадыһынан үрдүк буолара сабаҕаланар. Онон +32+35 кыраадыс куйаас бу кэмнэргэ киин улуустарга сатыылыаҕа. Хоту улуустар да хаалсыбаттар. Ордук Дьааҥы, Халыма Индигир улуустарыгар куйаарыа. Өймөкөөҥҥө анаабыт курдук, Олоҥхо ыһыаҕын саҕана бу нэдиэлэҕэ +32+34 кыраадыстаах куйаас түһүөҕэ.
Быйыл куйаас буолан сир аһа, от-мас, оҕуруот аһа «ыллыы-ыллыы» тахсыаҕа, ситиэҕэ. Онон быйаҥнаах сайын кэллэ. Эрдэ окко киирдэххэ, от балачча кэлиэҕэ. От ыйа онно сөп түбэһиннэрэн туран биэриэҕэ. Онон от түргэнник куурар, хатар кэмин куоттарбакка оттоотохпутуна, сөптөөх оту ылыахпыт дии саныыбын.
Быйыл атырдьах ыйа улахан ардахтаах буолара сабаҕаланар. Үс Ыспааһап ситимнэһэр былааннаах. Урут оннук сыллар кэлэн ааһаллар этэ. Ону учуоттаан, бука бары от ыйыгар окко күргүөмнээхтик тахсар сорук турар, — диэн бэлиэтээтэ норуот синоптига Тускул.
