Экология миниистирэ Сахамин Афанасьев ойууру уоттан харыстыыр суһал штаб мунньаҕын ыытта. Онно этиллибитинэн, ардаҕы аҕалар салгын тырааныспара Саха сиригэр от ыйын саҥатыгар үлэлиэҕэ.
Экология миниистирин солбуйааччыта Алексей Агеев иһитиннэрбитинэн, өрөспүүбүлүкэҕэ бэс ыйын 27 күнүгэр 101 ойуур баһаарын бохсууга үлэ ыытыллар, уопсай иэнэ 68819,2 га.
2046 киһи, 113 техника үлэлиир.
Ааспыт сууккаҕа 25 уот тохтотулунна, уопсай иэнэ 16 213,5 га.
Миниистир Сахамин Афанасьев тырааныспар министиэристибэтигэр уоту умуруорууга үлэлиир салгын аалларын экипажтарын санчаастарын кыраапыгын оҥорорго эттэ. Оччотугар пилоттар бэйэ-бэйэлэрин солбуйсуулара баар буолар. Маны сэргэ атын регионнартан Ми-8 МТВ бөртөлүөттэри кытыннарар туһунан эттэ.
РФ ЫБММ Е.Н. Зиничевка уонна РФ оборуонаҕа миниистирэ С.К. Шойгуга Ми-8 бөртөлүөттэринэн көмөлөһөллөрүгэр сурук бэлэмнэнэр. Маны сэргэ РФ экологияҕа министиэристибэтигэр баһаары бохсууга региоҥҥа балаһыанньа уустугунан эбии үбүлээһини көрөллөрүгэр этии оҥоһуллар.
Ан-26 «Циклон» «ВЕЕР» оборудованиелаах салгын суудуната ардаҕы аҕалыыга от ыйын саҥатыгар үлэлиэҕэ.
