Бу күннэргэ Өймөкөөн улууһун Томтор нэһилиэгин оҕолоро Дагестан өрөспүүбүлүкэтин Хасавюрт куоратыгар тустууга эрчиллэ сырыттылар.
Тириэньэр Владимир Саввинов эрчиллии (сбор) туһунан Томтор нэһилиэгин олохтоохторун батсаап бөлөҕөр маннык иһитиннэрдэ:
— Икки нэдиэлэ эрчиллиини астыбыт. Айаммыт оросукотугар үбүнэн көмөлөспүт Томтор нэһилиэгин баһылыгар Алексей Винокуровка тус бэйэм, оҕолор уонна төрөппүттэр ааттарыттан барҕа махталбытын тиэрдэбит. Бэрт баҕайы «сборга» сылдьан иһэбит.
Владимир Саввинов Томтор оҕолорун өр кэмҥэ тустууга уһуйбут уопуттаах тириэньэр. Хайдахтаах да уустук кэмнэргэ кини бэйэлэрин оҕолорун курдук көрөн-истэн, бүөбэйдээн Томтор үүнэн эрэр спортсменнарын ыраах куораттарынан илдьэ сылдьыыта — ыччат кэскилин, сайдыытын туһугар буоллаҕа.
Онон төрөппүттэр биир дойдулаахтара Владимир Саввиновка махталлара муҥура суох.
Елена Потоцкая, Саха сирэ
