12 От ыйа 12.07
  • 20°
  • $ 87,99
  • 95,68

Сунтаардар Дьокуускай аэропордугар Ойуунускай аатын иҥэрэри этэллэр

15:40, 26 ноября 2018
Текст:
Читайте нас на
Яндекс Новости
ЯДВ

Арассыыйа үрдүнэн ыытылла турар «Великие имена» бырайыакка дьон интэриниэт нөҥүө санаатын кыайа-хото үллэстэр, кими талыан баҕарарын этэр. Саха сирин киин аэропорда ханнык чулуу киһибит аатын сүгүөн сөбүн ырытыһабыт. Оттон сунтаардар кими талалларый?


Сунтаар улууһун олохтоохторо «Великие имена» бырайыакка кыттыһаллар.

Татьяна Федоровна Божедонова, бэтэрээн учуутал:

– П.А.Ойуунускай саха норуотугар хайдах курдук төгүрүччү улахан суолталааҕын 125 сыллаах үбүлүөйүнэн сибээстээн киэҥник кэпсэннэ, көрдөрүлүннэ, эдэр көлүөнэҕэ тириэрдилиннэ. Дьиҥинэн, атын да кандидатуралар улаханнык ытыктанар дьон. Оттон Ойуунускай диэн тыл уу сахалыы иһиллэрэ, уу сахалыы суолталааҕа сөмөлүөтүнэн көтөн кэлэн, Саха сиригэр маҥнай үктэнээччигэ, хантан эмит төннөн кэлиигэ даҕаны олус сылаастык, истиҥник, ахтылҕаннаахтык уонна киэн туттуулаахтык иһиллэригэр саарбахтаабаппын.

Надежда Григорьевна Львова, предприниматель, уопсастыбанньык:

– Мин эмиэ суруйааччы, бөлөһүөк, судаарыстыбаннай, уопсастыбаннай диэйэтэл, саха норуотун чулуу уола Былатыан Ойуунускай аатын киин куораппыт аэропордугар иҥэрэргэ куоласпын биэрэбин. Мин маннык улуу киһинэн, Ойуунускай убайбытынан киэн туттабын. Кини Саха сирэ сайдарыгар, саха норуота дьоллоох олохтоноругар бэйэтин доруобуйатын, олоҕун толук биэрбит дьонтон биирдэстэрэ буолар.

Егор Дмитриевич Алексеев, киин балыыһа суоппара:

– Саха сирэ автономияны ыларын турууласпыт киэн туттар дьоммут Аммосов, Ойуунускай, Барахов уо.д.а. Кинилэртэн биирдэстэрэ П.А. Ойуунускай төһө даҕаны уустук кэмҥэ олорон ааспытын иһин, төрөөбүт дойдутун туһугар өйүнэн-санаатынан, этинэн-хаанынан турууласпыт киһи. Ону таһынан саха сэбиэскэй литературатын төрүттээбит, олоҥхону бастакынан сурукка киллэрэн, аан дойдуга таһаарбыт киэн туттар биир бастыҥ киһибитинэн буолар. Онон киин куораппыт аэропорда улуу киһи Ойуунускай аатын сүгэрэ буоллар бэрт буолуо этэ.

Лена Витальевна Семенова, оҕо көрөн олорор эдэр ийэ:

– Киин куораппыт аэропордугар анаан турбут кандидатуралартан ыарахан кэмнэри ааспыт, биһиги билиҥҥи олохпут туһугар олохторун биэрбит дьонтон биирдэстэрэ Ойуунускайбыт аатын биэрэллэрэ буоллар. Кинини биһиги ыччат дьон суруйааччы эрэ быһыытынан билэбит. Дьиҥэр, кини Саха сирэ баар буоларыгар, биһиги бэйэбит сирбит-уоппут көмүскэллээх буоларын иһин туруулаһан, балыырга да түбэһэн, ыарахан олоҕу олорбут киһи буолар. Онон П.А. Ойуунускайы саатар аатын биэрэн, үйэтитэрбит буоллар.

Ааптар: «Сунтаар сонуннара»

Следите за самым важным и интересным в Telegram-канале и WhatsApp-группе ЯСИА