19 Тохсунньу 19.01
  • -48°
  • $ 73,82
  • 83,32

Сунтаар улууһун Түбэй Дьаарханыгар оттооһун туруга мөлтөх

11:48, 09 августа 2016
Текст:

Нэһилиэккэ тыа хаһаайыстыбатын исписэлииһэ Наталия Иванова оттооһун туругун ыйыталаспыппар: «Нэһилиэк үрдүнэн оттооһун туруга мөлтөһүөр. 370 тонна эрэ оттоннубут. Саатар бу күннэргэ ардахтар мэһэйдээтилэр. «Түбэй Дьаархан» ПК – 30 т, ИП ТСХПК – 165 т, ИП Петров А.М. – 12 т, ИП-лар – 154 т. Биирдиилээн отчуттар ардаҕы быыһы-лаан оттуу сатыы сылдьаллар», — диэн кэпсээтэ.


Бу күннэргэ Түбэй Дьаархаҥҥа улууспут урукку баһылыга, билиҥҥи култуура уонна духуобунас миниистирэ В.И.Тихонов кэлэн, оттооһун туругун билэн-көрөн барда. Арыылаах эбэ хотуҥҥа киирэн, ото кыайан үүммэтэҕин көрөн итэҕэйдэ да, сөхтө да. Ол сырыы кэнниттэн миниистир: «Миигин Бырабыыталыстыба дьаһайан ыытта. Көрдүм. Туруккут кырдьык мөлтөх эбит. Ол гынан баран, кыстыыр оккутун хайдах эмэ гынан бэйэҕит булуна сатааҥ. Истэргит, билэн олороргут курдук өрөспүүбүлүкэ үрдүнэн оттооһун туруга быстар мөлтөх. Үөһэттэн көмөнү эрэйимэҥ. Кыстыыр оккутун бэйэҕит кыаххытынан булунаргытыгар сүбэлиибин...» – диэтэ.

Миниистир этиитин истэн баран нэһилиэк ытык кырдьаҕаһа Владимир Петров: «Төһө да күчүмэҕэйин иһин, Бырабыыталыстыба чэпчэки сыанаҕа көрүүчэйинэн көмөлөһүөхтээх. Ону сэргэ ыраах үрэх баһа сирдэргэ, Мэлэкэҕэ даҕаны биригээдэ тэрийтэлээн, бөртүлүөтүнэн тиэхиньикэлэри, дьоннору таһаартыахтаахтар. Оннооҕор былыр оҕуһунан, атынан тахсаммыт илии хотуурунан охсоммут, кыстыыр оппутун бэлэмниир этибит. Билиҥҥи тиэхиньикэ сайдыбыт кэмигэр быстан түстэхпитий?» – диир.

0
0
19 января 19.01
  • -48°
  • $ 73,82
  • 83,32