23 От ыйа 23.07
  • 20°
  • $ 87,78
  • 95,76

Стратегия олоххо киирэрин хонтуруоллуохтара

16:47, 20 декабря 2018
Текст:
Читайте нас на
Яндекс Новости
ЯДВ

Ил Түмэн төрдүс (уочараттаах) мунньаҕар «Саха Өрөспүүбүлүкэтин социальнай-экономическай сайдыытын стратегиятын 2030 сылга диэри, салгыы 2050 сылга диэри туһаайыллыбыт сыалын быһаарар» сокуон барылын дьүүллэстилэр. Саха өрөспүүбүлүкэтин бырабыыталыстыбатын бэрэссэдээтэлин бастакы солбуйааччы Алексей Стручков дакылаат оҥордо. Ил Дархан кинини сокуону ырытыыга официальнай бэрэстэбиитэлинэн анаабыта. 


Саха Өрөспүүбүлүкэтин социальнай- экономическай сайдыытын стратегиятын 2030 сылга диэри, салгыы 2050 сылга диэри туһаайыллыбыт сыалын быһаарар сокуону ылыннылар. Бу туһунан экономика министиэристибэтин пресс-сулууспата иһитиннэрдэ. Сокуон барыла «Российскай Федерацияҕа стратегическай былааннааһын туһунан 172 №-дээх федеральнай сокуон уонна «Саха өрөспүүбүлүкэтин стратегиятын былааннааһын туһунан» өрөспүүбүлүкэ сокуонун чэрчитинэн оҥоһуллунна.

Алексей Стручков эппитин курдук, бырайыагы киэҥник дьүүллэһии түмүгэр тыһыынчаттан тахса бэлиэтээһин уонна этии киирбит. Ол этиилэри Стратегияны ситэрэн биэриигэ туһаммыттар. Ону таһынан госбырагырааманы оҥорууга уонна чочуйууга учуоттуохтара. Бу докумуоннары сокуон олоххо киирдэҕинэ, саҥардан биэриэхтэрэ.

«Стратегия туоларыгар эппиэтинэстээх дьон ананыахтара. Ил Дархан Инвестицияҕа анаммыт туһаайан этиитигэр олоҕуран оҥоһуллубут бырайыактарга эппиэтинэстээх менеджердары быһаарбыттара онуоха маҥнайгы хардыынан буолар», — диэтэ Стручков. Стратегия өрөспүүбүлүкэ сайдыытын түстүүр биир саамай улахан суолталаах докумуон буолар. Ол иһин бары хайысхатын дьоҥҥо-сэргэҕэ киэҥник сырдатыахха наада диэн дьокутааттар бэлиэтээтилэр. Барыл туолуутун сыл аайы парламеҥҥа отчуоттуур буолуохтара. Ону таһынан Ил Түмэн экономическай, инвестиционнай уонна бырамыысаланнай бэлиитикэҕэ кэмитиэтин чилиэннэрин этиилэрин ылынан, Стратегияны олоххо киллэриигэ сыһыаннаах үлэни сүрүннүүр бөлөх тэриллиэҕэ. Онно норуот дьокутааттара уонна бырабыыталыстыба чилиэннэрэ үлэлэһиэхтэрэ.

Саха сирин баһылыга Айсен Николаев бу Стратегия олох хаамыытынан уларыйан иһиэҕин бэлиэтээбитэ. «Стратегиябыт баараҕай мас курдук үүнэн-силигилээн иһиэхтээх. Онуоха олох ирдэбилигэр олоҕуран, бары биир ситимнээхтик үлэлээн сайдыыны түстүөхтээхпит», — диэбитэ кини.

Следите за самым важным и интересным в Telegram-канале и WhatsApp-группе ЯСИА