16 От ыйа 16.07
  • 21°
  • $ 87,81
  • 95,78

Сэттэ мэтээллээх Чемоханов

18:06, 18 апреля 2018
Текст:
Читайте нас на
Яндекс Новости
ЯДВ

Гаврил оскуолаҕа физкултуура учууталынан үлэлии сылдьан тымныйан, эмискэ бүөрэ аккаастаабыта. I группалаах инбэлииккэ тахсан, биэс сылы быһа диализка сылдьар дьылҕаламмыта. Онон, дьиэ кэргэнин илдьэ Дьокуускайга көһөн кэлбиттэрэ.

edersaas.ru

Олоҕун саамай күөгэйэр күнүгэр сылдьар 38 эрэ саастаах киһи ыарахан ыарыыга ыллардым диэн санаатын булгуруппатаҕа. Инбэлииппин диэн бэйэтигэр бүгэн хаалбакка, атын дьонтон итэҕэһэ суох оло­рорго дьулуспута. Интэриниэти хасыһан, аан дойду инбэлииттэрэ, доруобуйаларынан хааччахтаах дьоно туох хайдах олороллорун интэриэһиргээбитэ. Биир бүөрдээх-быардаах, сүрэхтэригэр эпэрээсси­йэлээх уо.д.а. уорганнарын көһөртөрбүт дьоҥҥо аналлаах спортивнай күрэх­тэһии баарын билбитэ. «Мин кинилэртэн туох итэҕэстээхпиний?!» – диэн санаата баһыйан, бэйэтин баҕатынан уонна дойдутун дьоно, дьааҥылар өйөөн, 2017 с. Польшаҕа ыытыллар Европейскай национальнай оонньууларга кыттыбыта. Онно тиийэн 2 кыһыл көмүс, 4 үрүҥ көмүс, 1 боруонса, уопсайа, 7 мэтээли түөһүгэр иилинэн, чөмпүйүөн үрдүк аатын сүгэн кэлбитэ.

Онтон кэлбитин кэннэ, балаҕан ыйыгар Саха сиринээҕи Медицинэ киинигэр киниэхэ бүөрү көһөрүү эпэрээссийэтин оҥорбуттара. Бастакы эпэрээссийэ табыллыбакка, иккистээн эпэрээссийэ остуолугар сытарга тиийбитэ. Ол тухары Гаврил үтүөрэргэ бигэ эрэллээх сылдьыбыта.

Гаврил ситиһиитин, олоххо тардыһыытын истэн (чуолаан, бэйэтэ дьоҥҥо-сэргэҕэ сылайбакка кэпсиирин түмүгэр) кини курдук ыарыылаах элбэх киһи санаата тосту уларыйбыта. Билигин Арассыыйаттан 12 киһи (ол иһигэр, биһиги уолбут) Италияҕа Европа чөмпү­йэнээтигэр кытта бараары сылдьар. Оттон аан дойду чөмпү­йэнээтэ Англияҕа буо­луохтаах.

Үрдүк чыпчаалларга тахсан баран, хайдах эрэ гынан дьоҥҥо көмөлөһүөхпүн наһаа баҕарар буолбутум. Тоҕо диэтэххэ, мин хайдах ситиһиилэммиппин, дьулуурдаах, тулуурдаах буоларга ханнык хаачыстыбалар наадаларын уо.д.а. элбэх киһи ыйыталаһар, сүбэ-ама көрдүүр. Онон, дьоҥҥо сүбэлиир, санааларын өрө көтөҕөр буолбутум. Дьоҥҥо көмөлөстөххүнэ, үтүө дьыаланы оҥордоххуна, бэйэҥ эмиэ эттиин-сиинниин чэпчииргин, дууһаҥ ырааһырарын билбитим. Урукку кыбыстанньаҥ, килбик да соҕус Ганя олох атын киһи буолбут курдугум, – диэн бэ­­йэтэ билбитин-көрбүтүн атын дьону кытары үллэстэр ураты долгутуулааҕын кэпсиир.

«Дьокуускай үтүө санаалаах дьоно»

Г.Чемоханов доҕотторунуун «Дьокуускай үтүө санаалаах дьоно» бырайыагы үлэлэ­тэн эрэллэр. Бырайыак доруобуйаларынан хааччахтаах, кэлээскэнэн эрэ сылдьар, ­илиилэрэ-атахтара хамсаабат уо.д.а. кыаммат дьоҥҥо көмөлөһөр сыаллаах-сорук­таах. Кинилэр, көмөлөһөр уонна өйүүр дьоно суох буоллахтарына, дьиэлэрин түөрт истиэнэтин көрөн баран сытан хаалыахтарын сөп. Ол иһин, итинник дьону уопсастыбаҕа таһаарар, харахтарын ары­йар, олоххо көрүүлэрин уларытар соруктаах үлэлии-хамсыы сылдьаллар. Итинник дьону булан, бэйэлэригэр чугаһатан, куоракка араас кэнсиэртэргэ (ол иһигэр «Руки вверх» кэнсиэригэр), пааркаларга, араас тэрээһиннэргэ сырытыннараллар. «Кинилэр үөрбүт харахтарын көрдөхпүтүнэ, махтаннахтарына, бэйэбит да санаабыт көтөҕүллэр, сөптөөх дьыаланан дьарыктанар эбиппит диэн өссө туох эрэ үйэлээҕи, туһа­лааҕы оҥорор баҕабыт күүһүрэр. Уопсайынан, мин доҕотторум-атастарым элбэхтэр. Кинилэргэ кэлэн: «Мин маннык дьыалаҕа кыттыһан эрэбин, эн эмиэ үтүө дьыаланы оҥоруоххун баҕарбаккын дуо?» – диэтэххэ, хаһан да аккаастаабаттар», – диэн кэпсии олорон, Гаврил харахтара уоттанан, килбиктик мичээрдээн ылар.

«Блогердар киирсиилэрэ»

Г. Чемоханов иннин диэки киэҥник хардыылыыр. Билигин «Блогердар киирсиилэрэ» оонньууга кыттаары, социальнай бырайыак оҥорон киллэрдэ. Биэс түһүмэхтээх «Блогердар киирсиилэрэ» биэс ый устата ыытыллыаҕа.

«Блогердар киирсиилэригэр» инбэлиит дьон кыһалҕатыгар уопсастыбаны тардаары, болҕомтолорун өссө күүһүрдээри кыттыһан эрэбин. Ону таһынан, блогердар эйгэлэригэр улахан үөрүйэҕи ылыахпын, сайдыахпын, көхтөөх дьайыылары оҥоруохпун баҕарабын.

Оонньууга сүрүн бириис — кыбартыыра. Ол кыбартыыраны мин сүүйэн кэбиһэрим буоллар, ону чахчы наадыйар дьоҥҥо биэрэн, үтүө дьыаланы оҥоруом этэ диэн ыралана саныыбын. Холобур, өрөспүүбүлүкэ улуустарыттан диализка кэлэр дьон олорор дьиэ-уот кыһалҕатын көрсөллөрүн көрө-билэ сылдьабын. Ол иһин, ол кыбартыыраҕа кинилэр эмтэнэ кэллэхтэринэ босхо олорон улаханнык абыраныахтарын харахпар оҥорон көрөбүн.

Үтүө дьыала хаһан баҕарар батыһыылаах буолар. Түгэнинэн туһанан эттэххэ, хаһан эрэ миэхэ аһымал аахсыйа ыытыллыбытыгар, элбэх киһи көмөлөспүтүгэр өссө төгүл ис сүрэхпиттэн махтанабын. Тустуук Виктор Лебедев үтүө дьыалаҕа кыттыһабын диэн бэйэтин аатыттан харчы биэрбитит­тэн олус долгуйбутум. Ардыгар духуобунай баай дьахталларга эрэ баарын, эр киһини тоҥкуруун, бэйэтин иэйиитин биллэрбэт тоҥ киһи курдук сыаналыыллар. Оннук буолбатах дии саныыбын. Миэхэ доҕотторум көмөлөспүттэрэ олус элбэх, бэл олох күүппэтэх да дьонум үтүө дьыаланы оҥорор дьоҕурдаахтарын билбитим… – диэн бүгүҥҥү дьоруойум олох хас биирдии түгэнин сыаналыы уонна киһиэхэ үчүгэйи эрэ көрөргө үөрэнии ураты дьол буоларын бэлиэтиир.

Аһымал аахсыйа

Араас кыһалҕалаах дьон Гаврилы аатын ааттаан, бэйэтин көрсөн, сүбэ-ама көрдүүллэр. Холобур, биир эдэр устудьуон ыарахан ыарыыга ылларбыт ийэтин Кореяҕа ыытан эмтииргэ көмө көрдөспүт. Кинини өйөөн, бу муус устар 23 күнүгэр Өксөкүлээх Өлөксөй аатынан Норуоттар доҕордоһууларын аатынан кииҥҥэ аһымал кэнсиэр ыытаары сүүрэ-көтө сылдьаллар.

Оттон Гаврилы «Блогердар киирсиилэригэр» социальнай ситимнэргэ киирэн, өйүүр дьон киниэхэ (gaver8019 dobroedelo_ykt) лайк туруоруохтарын, санааларын үллэстиэхтэрин, суруйсуохтарын сөп.

Надежда ЕГОРОВА, «Саха сирэ» хаһыат, edersaas.ru

0

0
Следите за самым важным и интересным в Telegram-канале и WhatsApp-группе ЯСИА