21 От ыйа 21.07
  • 18°
  • $ 88,02
  • 96,04

Сарсын — Пушкин төрөөбүт күнэ

17:40, 05 июня 2018
Текст:
Читайте нас на
Яндекс Новости
ЯДВ

    Бэс ыйын 6 күнүгэр нуучча литературатыгар сүдү кылааты киллэрбит хоһоонньут, драматург, прозаик Александр Сергеевич Пушкин төрөөбүтэ 219 сылын туолар.

 

Хас биирдии киһини оҕо саадыттан оскуола сылларыгар диэри өрүү Александр Сергеевич Пушкин арыаллыыр. Кырачаан сылдьан бары кэриэтэ билэр этибит оҕолорго анаммыт остуоруйаларын: «Сказка о царе Салтане», «Сказка о рыбаке и рыбке», «Сказка о мертвой царевне и о семи богатырях» уо.д.а. Оскуола орто сүһүөх кылаастарыгар үөрэнэ киирээт, «Капитанская дочка», «Евгений Онегин», «Руслан и Людмила» диэн өлбөт-сүппэт айымньыларын аахпыппыт. Үгүс дьон билигин даҕаны Пушкин хоһооннорун бастакы устуруокаларын иһиттэхтэринэ, салгыы өйтөн ааҕан барыах курдуктар. «У лукоморья дуб зеленый», «Я помню чудное мгновенье», «Во глубине сибирских руд», «Любви, надежды, тихой славы», «Мороз и солнце, день чудесный!»…

Быйыл Александр Сергеевич күн сирин көрбүтэ 219 сылын туолар. Түөрт сыллааҕыта Дьокуускай куоракка П. А. Ойуунускай аатынан Литературнай мусуойга Пушкин 215 сылыгар анаан «Пушкин и Якутия» быыстапка тэриллибитэ. Быыстапка күннэригэр дьон-сэргэ улуу суруйааччы сэдэхтик көстөр кинигэлэрин, хаартыскаларын көрбүттэрэ уонна сахалыы тылбаастаммыт айымньыларын кытта билсиспиттэрэ.

Бэс ыйын 6 күнүгэр А.Е. Кулаковскай аатынан култуура киинигэр «Норуоттар Пушкины ааҕаллар» диэн хоһоону ааҕааччылар күрэстэрэ («Народы читают Пушкина») буолуо. А.С. Пушкин аатынан Нуучча драматическай тыйаатырыгар Галина Карасева туруорбут «Сказка о царе Салтане» остуоруйаны көрдөрүөхтэрэ. Ону таһынан бүтүн өрөспүүбүлүкэ үрдүнэн хоһоон ааҕыытыгар тэрээһиннэр ыытыллыахтара. Дьокуускай куоракка Ленин проспегын 21 N-гэр баар Пушкин бюһун аттыгар үгэс буолбут хоһоон ааҕыылара буолуохтара.

Александр Сергеевич Пушкин нуучча литературатыгар эрэ буолбакка, бүтүн Арассыыйа дьонун өйө-санаата, кэрэҕэ көрүүтэ олохтоноругар, нуучча тыла сайдарыгар үлэлэспит киһи буолар. Кини икки үйэ эҥэрдээх айымньылара билигин даҕаны ааҕааччыны кытта биир тылынан кэпсэтэллэр уонна суруллубут санаа күүһэ дьиктитин бигэргэтэллэр.

 

Света ИВАНОВА, «Саха сирэ» хаһыат, edersaas.ru

0

0
Следите за самым важным и интересным в Telegram-канале и WhatsApp-группе ЯСИА