Саха сиригэр сыстыганнаах ыарыылары эмтиир балыыһа тутуутун туһунан бырайыак быһаарыыга сылдьар. Ол туһунан бырабыыталыстыба бэрэссэдээтэлин солбуйааччыта Ольга Балабкина быһа эфигэ кэпсээтэ, СИА суруйар.
«Аныгы инфекционной балыыһаны тутуу былааҥҥа баар. Бырайыак оҥоһуллар, Россия доруобуйаҕа харыстабылын министиэристибэтин кытта өрөспүүбүлүкэ баһылыгын, бырабыыталыстыба бэрэссэдээтэлин бастакы солбуйааччытын таһымнарыгар дуогабар түһэрсилиннэ. Докумуон быһаарыыга сылдьар», — диэтэ Ольга Балабкина.
Саха сирин тустаах миниистирэ Елена Борисова эрдэ эппитинэн, Дьокуускайга сыстыганнаах ыарыылары эмтиир балыыһа тутуута 2022 сылга саҕаланыан сөп.
