Тустууктар Арыйан Тютрин, Владимир Егоров уонна Андрей Бекренев Румынияҕа көҥүл тустууга Европа чемпионатыгар киирсэллэр. Бүгүн, олунньу 15 күнүгэр, кыттааччылар сэрэбиэй бырахсыылара буолла, суруйар ЯСИА.
Аан дойду чемпионатын боруонса призера Арыйан Тютрин (57 кг), Беларуссияттан киирсэр, турниры квалификацияттан саҕалыаҕа. Кини бастакы утарсааччыта Азербайджан чемпиона Ислам Базарганов буолар, кини 2015 сыллаахха Европаҕа юниордарга бастыыр иһин күрэхтэһии кыайыылааҕа. Саха тустууга финал 1/4 түһүмэҕин кыайдаҕына Германияттан Хорст Лероны кытта күөн көрсүөҕэ. Тютрин олунньу 16 күнүгэр көбүөргэ тахсыаҕа.
Европа чемпиона Владимир Егоров (61 кг), Македонияттан кыттар, квалификацияҕа Азербайджантан Нураддин Новрузовы кытта киириэҕэ. Бу категорияҕа Андрей Бекренев (Беларусь) Францияны көмүскүүр Арман Элояны кытта финал 1/8 түһүмэҕэр утары туруохтара.
61 кг диэри ыйааһыннаах тустууктар киирсиилэрэ олунньу 17 күнүгэр буолар.
