Казахстаан уонна Саха сирэ спорт эйгэтигэр бииргэ үлэлэрин 2024 сылга буолар бөдөҥ тэрээһиннэргэ өссө чиҥэтэн биэриэхтэрэ. Ол туһунан Ил Дархан Айсен Николаев Казахстаан Өрөспүүбүлүкэтин туризмҥа уонна спортка миниистирэ Ермек Маржикпаевы кытта көрсүһүүтүгэр кэпсэттилэр, суруйда регион салалтатын пресс-сулууспата.
Өрүттэр 2024 сылга Дьокуускайга буолар «Азия оҕолоро» VIII норуоттар ардыларынааҕы оонньууларга уонна Астанаҕа ыытыллар кочевниктар V аан дойдутааҕы оонньууларыгар бэлэмнэнии уонна кыттыы туһунан кэпсэттилэр.
Ермек Маржикпаев эппитинэн, балаҕан ыйыгар буолар Кочевниктар оонньууларын бырагырааматыгар тэрийээччилэр мас-рестлинг көрүҥүн киллэрбиттэр. Миниистир «Азия оҕолоро» оонньуулар Казахстаан эдэр спортсменнара ситэн-хотон тахсалларыгар оруолун бэлиэтээтэ.
««Азия оҕолоро» оонньуулар аан бастаан 1996 сыллаахха ыытыллыахтарыттан, Казахстаан куруук көхтөөхтүк кыттар. Быйыл да бастакынан кыттарга бэлэмин биллэрбитэ. Эһиги эдэр спортсменнаргытын Саха сиригэр күүтэбит», — диэтэ Айсен Николаев.
