22 От ыйа 22.07
  • 18°
  • $ 88,02
  • 96,04

Саха таҥаһыгар сунтаардар бастаатылар

09:08, 24 июня 2018
Текст:
Читайте нас на
Яндекс Новости
ЯДВ

Туймаада быйылгы ыһыаҕын биир тэрээһининэн “Саха талба – маанылаах таҥаһа” саха национальнай таҥаһын куонкуруһа буолла. Ол эрээри, урукку сыллартан уратыта диэн , иистэнньэҥнэр эрэ кытыннылар. Дьүүллүүр сүбэ 40-ча иистэнньэҥтэн кыайыылааҕы быһаарда.

edersaas.ru

Куонкурус ааспыт сыллааҕыттан уратыта үгүс. Ол курдук, Хатастааҕы култуура киинин уус-уран салайааччыта, саха таҥаһыгар күрэхтэһии эппиэттээх үлэһитэ Вилена Константинова бэлиэтииринэн, иистэнньэҥнэри өрө тутар инниттэн, ким баҕалаах барыта сахалыы таҥаһы сайбаччы кэтэн кэлэн кыттыбакка, иистэнньэҥнэр бэйэлэрэ тикпит таҥастарын модель булан сайыҥҥы, кыһыҥҥы диэн икки хайысханан көрдөрбүттэр.

Улахан маастардартан Дарья Козлова, Николай Никитин, Вера Варфоломеева, Анисия Фадеева, о.д.а. кыттыбыттар.

Хаҥастан уҥа куонкурус дьүүллүүр сүбэтин чилиэнэ, историческай наука кандидата Светлана Петрова, күрэхтэһии эппиэттээх үлэһитэ, Хатастааҕы култуура киинин уус-уран салайаачыта Вилена Константинова

Ааспыт сыллаахха сахалыы таҥаска Гиннес рекордун олохтуурга 100-тэн тахса маастары мунньан сахалыы таҥастары көрдөрбүттэрэ. Саха таҥаһа үрдүк чыпчаалга тахсыбытын ити тэрээһин көрдөрбүтэ. Ол иһин быйылгы ыһыахха арыый уларытан, күрэхтэһиини маастардар, иистэнньэҥнэр ортолоругар ыытыахха диэн санааҕа кэлбиттэрэ. “Түмүгэ олус үчүгэй. Тоҕо диэтэххэ, урукку сылларга сүүстэн тахсалыы киһи кыттара эрээри, хаачыстыба өттүнэн арыый намыһах этэ. Бу сырыыга саха таҥаһа маннык тигиллиэхтээх, маннык буолуохтаах диэн. Ону тэҥэ, 17-18-с үйэтээҕи умнубут таҥаһы сөргүтүү, киэҥ эйгэҕэ көрдөрүү буолар. Холобура, Чурапчы маастара Наталья Лонгинова 17-с үйэтээҕи сарыыны быыспакалаан таҥас тигэн таһаарда. Оттон Дарья Козлова 17-с үйэтээҕи оҕуруолаах сутуруолаах эр киһи таҥаһын көрдөрдө”, —диэн кэпсиир дьүүллүүр сүбэ чилиэнэ Светлана Петрова.

Уһун сүбэлэһии кэнниттэн “Саха талба — мааны таҥаһа” куонкурус кылаан бирииһин хаһаайынынан “Сунтаар ситимэ” уопсастыбаннай тэрилтэ (сал. Антонина Кириллина) ааттанна. Кинилэргэ Альфа баан аатыттан морозильнай камераны уонна тэлэбиисэри бэлэх туттулар. Бэлиэтээн этэххэ, Альфа баан бирииһэ хааһахтан хостонон иһэр кэриэтэ. Букатын хас биирдиилэригэр тэлэбиисэриттэн саҕалаан хоруопкалаах, сыаналаах бэлэхтэри ууннулар.

Кыайыылаахтар:

1 ст. диплом — Розалия Местникова (10 тыһ. солк. сэртипикээт)

2 ст. диплом — Николай Никитин (манекен)

3 ст. диплом — Варвара Федорова (кыра оһох)

1 ст. диплом – Наталья Логинова

2 ст. диплом – Анисия Фадеева

3 ст. диплом — “Кырадаһын абылаҥа” түмсүү (сал. Д.С.Козлова)

Антонина Кириллина: “Туймаада ыһыаҕар аан маҥнайгытын кытынныбыт. Улахан түһүлгэҕэ кэлэн улахан бирииһи ылбыппытыттан олус үөрдүбүт, долгуйдубут. Урут ким баҕарар кэлэн кыттар эбит буоллаҕына, бүгүн 17-19-с үйэтээҕи таҥастары көрдөрдүлэр. Манна биһиги хотойдоох саҕынньаҕы тиктибит. Былырыын улууспутугар “Норуот бүддьүөтэ” диэн 200 тыһ. солк. суумалаах Граны сүүйэн турабыт. Ол харчынан хотойдоох сон тикпиппит. Соммутун кэлэр сылга улууспутугар духуобунас киинэ аһылыннаҕына экспонат быһыытынан туруорар былааннаахпыт”, — диэн кылгастык санаатын үллэһиннэ.

«Сунтаар сүбэтэ» уопсастыбаннай тэрилтэ салайааччыта Антонина Кириллина хотойдоох сону кэтэн турар

Бириистэрин хайдах үллэстэллэрин улуустарыгар тиийдэхтэринэ тикпит иистэнньэҥнэннэр бары биир сүбэнэн быһаарар санаалаахтар.

 

Людмила ПОПОВА, “Саха сирэ” хаһыат, edersaas.ru 

Ааптар хаартыскаҕа түһэриилэрэ.

2

2
Следите за самым важным и интересным в Telegram-канале и WhatsApp-группе ЯСИА