Саха сиригэр 2022 с. баһаарынай сезонугар бэлэмнэнии күүскэ ыытыллар. Өрөспүүбүлүкэ нэһилиэнньэтин олоҕор-дьаһаҕар куттал суох буолуутун хааччыйар судаарыстыбыннай кэмитиэт ойуур баһаарыттан харыстааһыҥҥа олохтоох салалтаны хонтуруоллуур. Бэлиэтээн эттэххэ, быйыл ойуур баһаара кутталы үөскэтэр сирдэрин испииһэктэригэр барыта 477 нэһилиэк киирдэ, диэн биллэрбиттэрин СИА кэпсиир.
Саха сирин баһылыга Айсен Николаев «2021 с. баһаарынай сезонун түмүктэрин уонна 2022 с. соруктарын туһунан» оперативнай штаб мунньаҕын түмүгүнэн, республика муниципальнай тэриллиилэригэр 2022 сылга баһаартан сэрэхтээх буоларга минерализированнай балаһа оҥорорго, резервнэй пуонда бүддьүөтү көрөллөрүн сорудахтаата.
Арассыыйа ЫБМ кылаабынай дьаһалтата 120- тан тахса муниципальнай тэриллиилэргэ ыйыы-кэрдии биэрдэ, олортон билигин 84 нэһилиэнньэлээх пууннарга баһаартан харыстыыр дэлби тэптэриини тэрийии уонна минерализованнай балаһалары ууруу боппуруостарыгар дьаһаллар толоруллубатылар.
2022 сыл саҕаланыаҕыттан баһаартан сэрэхтээх буолуу бэрээдэгин 28 965 киһиэхэ быһаардылар. Баһаартан куттал суох буолуутун дьаһалларын үөрэтии чэрчитинэн 183 дьарык, кэпсэтиилэр уонна лекциялар ыытылыннылар, ол иһигэр оҕолорго – 441.
Бэлиэтээн эттэххэ, бу күннэргэ өрөспүүбүлүкэ бастакы вице-премьерэ Дмитрий Садовников 2022 с. баһаарынай сезонугар бэлэмнэнии оперативнай штабын кэккэ мунньахтарын саҕалаата. Саха сирин баһаарынай сезонугар бэлэмнэниигэ алта зонаҕа арахсаллар: киин, илин, арҕаа, соҕуруу зоналар, ону тэҥэ икки арктическай зоналар. Олохтоох салайыныы ойуур баһаарын умуруорууга локальнай комплекснай былааннары ылыныахтаах, минерализованнай балаһалары сөргүтүүгэ, уоттан сэрэхтээх буолууга уонна да атын дьаһаллары ыытарга.
